Аймақтар • 28 Шілде, 2020

Індетті ауыздықтаудың жолдары бар

37 рет көрсетілді

«Жаман айтпай, жақсы жоқ». Алматы күзде бір мезетте COVID-19 симпто­мы бар 7700 пациентті қамти ала ма? Эпидемиялық жағдай күрде­ле­не түсетін жағдайға қала дайын ба? Мегаполисте дәрі-дәрмек тапшы­лы­ғы­­на байланысты жағдай тұрақталды ма? Осы мәсе­ле­лерге байланыс­ты Ал­ма­ты қаласының әкімі Бақытжан Сағынтаев БАҚ өкілдерінің сұ­рақ­та­рына тіке­лей эфирден жауап берді.

Әкім журналистермен онлайн кездескен бейсенбіде қалада COVID-19 жұқтырған 9851 адам тіркелді. Соңғы бір тәулікте 216 оқиға анықталды. Жыл ба­сынан бері өкпе қабынуына ұшы­ра­ған 6175 науқас жазылып шықты. Егер осы дерт шарықтап тұрған кезде емдеу орындарына 300 науқас түссе, қазір олар­дың саны – 133.

«Күнделікті ірі әрі көпбейінді ауру­ха­налардың бас дәрігерлерімен сөй­лесіп отырмын және қанша адамның емделіп жатқанын, ауруханалардағы жағдай туралы ұдайы хабардармын. Мысалы, ауру шарықтап тұрған кезде №7 клиникаға 100 науқасқа дейін түсе­тін, соңғы кезде емделуге жат­қы­зы­латындар саны 15-20 адам. №4 клиникада да, ЖМЖА-да, №1 клиникада да нау­қастар саны күрт азайған. Яғни өкпе қабынуына ұшыраған науқастарды емдеу орындарына жатқызу 2 есеге төмен­де­ді», деді қала әкімі.

Шаһар басшысы медициналық-санитарлық алғашқы көмек шеңберінде виртуалды жұқпалы аурулар ауруханасы құрылғанын мәлімдеді. Амбу­ла­то­рия­лық деңгейде 72 мобильді бригада жұмыс істейді. Мұнда мамандардың саны іс жүзінде екі есеге артып, 405 ме­дицина қызметкері осы іске жұ­мыл­ды­рылған.

Мобильді топ мамандары пациенттерге үйде көмек көрсетеді, олар аса қажетті жеке қорғаныс құралдарымен жаб­­дықталған, ПТР тест алу жұмыс­та­рын жүргізеді, қажет болған жағдайда ем тағайындайды және тиісті дәрі-дәр­мек­пен қамтамасыз етілген үй стацио­на­­рын ұйымдастырады.

– Міндеттелген тапсырмаларға сәй­кес қалада қауіпті індеттің кең етек алуы­на жол бермеу мақсатында эпиде­миялық ахуалды басқа­ру­дың жаңа моделі енгізілді, – дейді мегаполис бас­­шысы. Қала әкімі нақты атқарылған ша­ра­ларды ретімен тізбектеп шықты.

– Біріншіден, COVID-19, ЖРВИ, пнев­мониясы бар науқастарға жедел ме­­дициналық көмек көрсету алго­рит­мі жетілдірілді. Енді жедел жәр­дем нау­қасты ауруханаға жатқы­зу­дың жал­ғыз тетігі болып табылады, жұқ­па­лы ста­цио­нарлардағы пациент­терді бағыт­тау­дың цифрлы тетіктері енгі­зілді. Біз бұл тәсілді 13 шілдеден бас­тап енгіздік, – деді әкім.

 Екіншіден, бүгінгі таңда пандемияны тоқтатудың ең тиімді екі жолы бар: бұл – қазіргі қолданылып жүрген шектеу шаралары және төсектік орын санын арттыру. Індет басталғалы бері инфекциялық стационарлардың саны 2-ден 26-ға дейін (500 орыннан 6096 орынға дейін) өсті. Біз күзде COVID-19 симптомдары бар 7700 пациентті бір мезгіл­де стационарлық ем шаралары­мен қамтамасыз ете аламыз, – деді ша­һар басшысы.

Сапалы емге әсер ететін фак­тор­лар­дың бірі – науқастарды меди­циналық оттегімен қамтамасыз ету. Бұл мәселені жүйелі түрде шешу үшін медициналық ұйым­дарға оттегі стансаларын орнату бойынша қалалық бағдарлама қабыл­дан­ды.

«Егер клиникаларда қажетті көлемде қамтамасыз ете алатын өз оттегі стансасы болмаса, бұл жүйені реттеу керек. Оған қаржы бөлінді. 10 қыркүйекке дейін ауыр жағдайдағы науқастармен жұмыс істейтін бірінші эшелондағы 8 клиника орталықтандырылған оттегі беру жүйесінің стационарларымен қам­тамасыз етіледі. Екінші кезеңде біз екінші эшелондағы клиникаларды отте­гімен қамтамасыз етуге көшеміз, сол арқылы бұл мәселені шешеміз», деді әкім.

Қ­ала басшысының айтуынша, алда­ғы күндері жаңа стационарлар енгізіл­мек. Олар алдын-ала санитарлық-эпи­демиялық аудиттен өткен, ден­сау­лық сақтау объектілерінің базасында ашылады.

– Қазір жауапты мамандар құрылыс жұмыстарын жүргізуде. Оның ішінде 250 төсектік «Қазақстан», 376 төсектік «Көктем», 140 төсектік «Самал» пансио­наты, 230 төсектік «Астана» қонақүйі, 360 төсектік ҚазАТК жатақханасы, 100 төсектік ҰОС мүгедектеріне арналған республикалық клиникалық госпиталь, 500 орынға шақталған Арнаулы әлеуметтік қызмет көрсету орталығы бар. Бұл жаңа стационарлар жұмыс істеп тұрған нысандарға қосымша тамыз айының соңына дейін кезең-кезеңімен іске қосылатын болады, – дейді Б.Сағынтаев.

Сол сияқты Алматыда ана мен бала­ның денсаулығын қорғауға ерекше көңіл бөлінгені туралы бірінші рет ай­ты­­лып тұрған жоқ.

– Біз үшін барлық әйел-ананың бүгінгідей пандемия кезеңінде қауіпсіз жағдайда босануы, босанғанға дейін және босанғаннан кейін де ұдайы кү­тім­де болуы аса маңызды. Қалада 45 төсектік №4 перзентхана жұмыс істейді. Жақын арада осы перзентхананың 60 төсектік орынға арналған жаңа корпусы іске қосылады. Сонда мұндағы жалпы орын саны 105-ке жетеді, – деді әкім.

Қосымша стационарлардың ашылуы – Алматы қаласында індетті тежеу мен оған тегеурінді түрде қарсы тұру бағытындағы іс-шаралар жоспарының бір бөлігі. Пациенттерді шұғыл орналастыру үшін уақытша стационар болу мүмкіндігі бар нысандарға күнделікті мониторинг жүргізіледі.

– Біз бұған дейін жасалмаған шараларды қолға алдық. Шұғыл әрі қысқа мерзімде ауқымды жаңа стационарлар ашып, оны қажетті барлық техникамен жабдықтап жатырмыз. Ғимараттардың бөлмелерін қайта жоспарлап, шлюздер мен оқшауланған бокстар құрылуда. Барлық деңгейдегі ме­дициналық көмек көрсетудің тиім­ді­лі­гін арттыру үшін денсаулық сақтау жүйесіне өзгерістер енгізілуде. Сондай-ақ қосымша төсектік орындар жасақтау арқылы қаланың барлық кадрлық резервін жұмылдырып отырмыз. Бүгінгі таңда пандемиямен күрестегі алдың­ғы шепке 4464 медицина қызмет­ке­рі (2681 дәрігер мен орта медицина мамандары) жұмылдырылды. 1526 ма­маннан (дәрігерлер – 246, орта қыз­меткерлер – 1009, кіші меди­ци­на­л­ық қызметкерлер және басқалары – 145, волонтерлер – 106) кадрлық резерв жасақталды. Барлығы 328 адам жұмысқа орналастырылды (оның ішінде 96 дәрігер, 160 орта медицина қызметкері, 72 кіші медицина қызметкері және басқалар). Үшіншіден, медициналық қызметтердің сапасын арттыру үшін науқастардың ауруының ауырлық дәрежесі бо­йынша барлық стационарларды бөлу қағидаты – эшелондау енгізілді. Мұның маңызды көрсеткіштерінің бірі – төсек орындарының қолжетімділігі. Егер бұрын стационарларда орынның бос болмауы 86%-ды құраса, бүгінде бұл көрсеткіш 60%-ға дейін төмен­де­ді. Төртіншіден, жағдайы ауыр науқастар мен өлім-жітімді азайту үшін жетекші мамандары бар Реани­ма­тология және анестезиология орта­лы­ғы белсенді жұмыс істейді. Бұл – қаланың барлық реанимациялық бөлімшелеріндегі науқастарға мониторинг жасап, жағдайы ауыр әрбір науқастың ахуалын бақылайтын мобиль­ді реанимациялық, көшпелі же­дел әрекет ету тобы. Біз бұл орталық жұмы­сының оң нәтижесін көріп отырмыз. Реаниматологтардың мобильді тобы қала клиникаларындағы реанимация бөлімшелерінің жабдықталуына мониторинг жүргізді. Жағдайы ауыр науқастар бойынша консилиумдарға қатысып, халі нашар науқастарға барып клиникалық-диагностикалық іс-шаралар өткізеді, дейді мегаполис же­текшісі. Сондай-ақ қала әкімдігі медициналық мекемелерді оттегімен қамтамасыз етуде ауқымды бағдарлама әзірлеп, жүзеге асыруда. Қалада 40 күн ішінде 1 эшелонның стационарлары төсектерін 100 пайыз оттегімен қамтамасыз ету жоспарланып отыр. Бұл – бесінші. Алтыншыдан, алғашқы медициналық-санитарлық көмек ұйымдары деңгейінде мобильді бригадалар жұмыс істеп отыр. Мобильді топтар қалалық емханалардың жұмысын күшейту үшін құрылды. Алгоритмге сәйкес мобильді бригада екі жағдайда пациенттің үйіне бара алады: ПТР тестке материал алуға және емхана дәрігерінің тағайындауы бойынша үйде емдеуге. Сол сияқты қауіпті топтағы амбулаториялық науқастарға бақы­лау­ды күшейту үшін Пациенттерді мо­ниторингтеу орталығы жұмыс іс­тей­ді. Мониторинг орталығына түрлі саладағы 58 дәрігер (терапевт, педиа­трлар, пульмонологтар, аллергологтар, кардиологтар) жұмылдырылды. 1 шілдеден бастап Мониторинг орта­лы­­ғы амбулаторлық емдеудегі қауіп то­­бы­на енген пациенттерге 505 кеңес берді.

«Індетке қарсы күрестің алғашқы 10 қадамы» жоспары шеңберінде Алматы агломерациясында карантиндік шараларды үйлестіру жұмыстары басталды. Алматы облысындағы әріптестермен бірге Алматы қаласында жұмыс істеп қана қоймай, медициналық қызмет те алатын Талғар, Еңбекшіқазақ, Іле және Қарасай аудандарындағы жағдай да тексерілді.

– Біз эпидемиялық жағдайды тұрақ­тандыруда ауқымды жұмыс ат­қар­­дық десек те болады. Осы айларда туын­даған қиындықтарды еңсеруде көп тәжірибе жинақталды. Әрине бұл тәжірибені басқа өңірлермен де бөлісе­тін боламыз. Жақын арада осы жолда жа­салған қадамдар жайында баяндайтын семинарлар сериясын бастаймыз, – деді қала әкімі.

 

АЛМАТЫ

 

Соңғы жаңалықтар

ҚТЖ: Тағы бір басшы ұсталды

Аймақтар • Бүгін, 10:47

Пневмониядан 3 адам қайтыс болды

Коронавирус • Бүгін, 09:25

Жеке рекордын жаңартты

Спорт • Бүгін, 09:03

Арқа көкпаршылары атқа қонды

Аймақтар • Бүгін, 09:02

Топжарған «Торпедо»

Спорт • Бүгін, 08:59

«Қара пантера»

Спорт • Бүгін, 08:58

Жамбылдық жомарт түлектер

Аймақтар • Бүгін, 08:55

Сөз сойыл №100

Қоғам • Бүгін, 08:52

Дәрігерлерге тарту

Театр • Бүгін, 08:50

Үнемді өндіріске – үлкен қадам

Экономика • Бүгін, 08:44

Қазақы болмысты Хәрри Поттер

Әдебиет • Бүгін, 08:39

Ұқсас жаңалықтар