Аймақтар • 30 Шілде, 2020

Жамбылда цифрландыру жұмыстары әлсіз әрі жүйесіз жүргізілуде

299 рет
көрсетілді
3 мин
оқу үшін

Тараз қаласында ағымдағы жылы 1 тамыздан бастап қоғамдық көліктерге төлем жасаудың электронды жүйесі іске қосылу керек болатын. Алайда, оған кедергі келтіріп отырған мәселелер болғандықтан бұл бастама кейінге шегерілді. Аталған мәселені Тараз қаласының әкімі Айтқазы Қарабалаев карантинге байланысты техниканы жеткізуде қиындықтар туындағанымен түсіндірді, - деп жазады Egemen.kz

Жамбылда цифрландыру жұмыстары әлсіз әрі жүйесіз жүргізілуде

Қала әкімінің айтуынша, қажетті жабдықтар тамыз айының басында Қытайдан жеткізіледі екен. Сондай-ақ, электронды карталар жоспарланған мерзімнен сәл кешірек Ресей мемлекетінен әкелінеді. Пайда болған мәселелерге байланысты Айтқазы Қарабалаев Жамбыл облысының әкімі Бердібек Сапарбаевтан электронды билеттер жүйесін енгізуді 15 тамызға ауыстыруды сұрады. Қала әкімі өз сөзінде "Tulparcard" веб-сайты мен мобильді қосымшасы жасалып жатқандығын да айтып өтті.

Алайда Бердібек Сапарбаев Тараз қаласының әкімдігі де, облыстық жолаушылар көлігі және автомобиль жолдары басқармасы да қолма-қол ақшасыз төлем жүйесін енгізуге тиісті деңгейде көңіл бөлмегенін айтты. Әуел бастан өзге өңірлердің тәжірибесін зерделеп, барлық қателіктерді ескеруі керек екенін ескертті. Сондай-ақ, ол Тараз қаласының әкіміне қала тұрғындары арасында ақпараттандыру жұмыстарын жүргізіп, жүйенің қалай жұмыс істейтінін түсіндіруді тапсырды "Tulparcard" электронды картасы балаларымызды қорғауға тамаша мүмкіндік береді. Қосымша функцияларды қосу керек. Сіз бұл карталарды мектепке кіру үшін пайдаланып, асханада түскі ас үшін төлем жасай аласыз. Ал, мобильді қосымша ата-аналарға балаларын бақылауға мүмкіндік беруі керек. Осы функциялардың бәрі жүйе іске қосылғанға дейін электрондық картаға және мобильді қосымшаға енуі тиіс", деді Бердібек Сапарбаев.

Басқосу барысында өңірдегі цифрлық технологияларды дамыту мәселелері де талқыланды. Инвесторларға қызмет көрсету, жобалық басқару және цифрландыру орталығының басшысы Дамир Егізбаев "Цифрлы Қазақстан" Мемлекеттік бағдарламасына сәйкес "Ақылды қала" тұжырымдамасының жүзеге асу барысы туралы баяндады. Цифрлық технологияларды дамытуда құрылыс, әлеуметтік сала, экология, қауіпсіздік, көлік, тұрғын үй-коммуналдық шаруашылық, бизнес және туризм салаларында төмен көрсеткіштер байқалатыны айтылды. Бұл орайда Бердібек Сапарбаев тиісті басшыларға "Ақылды қала" тұжырымдамасын жүзеге асыру жұмыстарын жүйелеуді жүктеді. Сонымен қатар, әкім өңірде цифрландыру жұмыстары әлсіз және жүйесіз жүргізілуде екенін айтып, сала жұмысын сынға алды. "Инвесторларға қызмет көрсету, жобалық басқару және цифрландыру орталығы мен басқармалардың өзара келісім мен үйлесімді жұмысы көрінбейді. Біз өмірімізді жақсартудың көптеген мүмкіндіктерді жіберіп аламыз. Президент Қасым-Жомарт Тоқаев цифрландыру тек бір саланы жетілдіруге ғана емес, экономика мен қоғамдық өмірдегі елеулі өзгерістерге де бағытталғанын әрдайым айтып келеді. Тіршіліктің барлық салаларына озық және заманауи технологияларды енгізу басым міндет болып қалуы тиіс", деді Бердібек Сапарбаев.

 

Жамбыл облысы