ГРУЗИЯМЕН ӘРІПТЕСТІК НЫҒАЯ ТҮСПЕК

Кеше Үкімет үйінде Қазақстан Премьер-Министрі Кәрім Мә­сі­мов Грузия Премьер-министрі Николоз Гилауримен кездесті. Екі ел делегациясы арасында жүргізіл­ген келіссөздер қорытындысы бой­ынша Қазақстанның Қаржы рыногы мен қаржы ұйымдарын рет­теу және қадағалау агенттігі мен Грузияның Ұлттық банкі ара­сында өзара түсіністік туралы ме­морандумға қол қойылды. Оған Қа­зақстан тарапынан агенттік төр­айымы Елена Бахмутова, ал Грузия тарапынан Ұлттық банк төрағасы Георгий Кадагидзе қол қойды. Қазақстан мен Грузия ара­сындағы дипломатиялық қарым-қа­тынас 1992 жылдан бастау ала­ды. Осыған дейін екі ел арасында түрлі бағыттарда  50-ден астам екі­жақты құжаттарға қол қойылған. Дегенмен, екіжақты ресми дип­ло­матиялық ынтымақтастықты рет­тей­тін құжат негізі 1993 жылы сол кездегі Грузия басшысы Э.Ше­вар­днадзенің елімізге ресми сапары барысында қол қойылған Қазақ­стан және Грузия республикалары арасындағы өзара қарым-қатынас туралы келісім болып табылады. 2008 жылы Грузия мен Қазақ­стан арасындағы тауар айналымы 67,2 млн. долларды құраған көрі­не­ді. Оның ішінде ел экспор­ты­ның көлемі 49,7 млн.долларды көрсетсе, Грузия елінен келетін экспорт көлемі 17,3 млн.долларды құрапты. Біздің елімізден негізінен бидай экспортталатын болса, Грузиядан келетін өнімдер тізімі жиһаз, металлургиялық, мәшине жасау, химиялық және азық-түлік өнімдерінен, түрлі ферроқорытпалардан тұрады. Қол қою рәсімінен соң еліміз Премьер-Министрі Кәрім Мә­сі­мов келіссөз барысында екіжақты қарым-қатынас мәселелерімен қатар, Қазақстан бидайы үшін Грузия жерінде арнайы терминал салу мәселесінің де талқылан­ға­нын жеткізді. Грузия Үкімет бас­шы­сының айтуынша, бұл Қазақ­станға осы тауар түрін әртарап­тандыруға мүмкіндік бермек. Үстіміздегі жылдың жазында, атап айтсақ, тамыз-қыркүйек ай­ларында Қазақстан Үкіметінің делегациясы осы мәселелерді пысықтау үшін баратын болады. Венера ТҮГЕЛБАЙ.