Еңбек және халықты әлеуметтік қорғау вице-министрі Ерлан Әукеновтің төрағалығымен өткен шараға Адам құқықтары жөніндегі уәкіл Эльвира Әзімова, МӘМ директорлары мен әлеуметтік сала қызметкерлері қатысты.
Ерлан Әукенов өз сөзінде Еңбек және халықты әлеуметтік қорғау министрлігі арнайы әлеуметтік қызметтердің сапасын арттыру бойынша жүйелі жұмыс жүргізіп жатқанын атап өтті. МӘМ қызметін жетілдіру мақсатында министрлік жергілікті атқарушы органдар мен қоғамдық бірлестіктердің ұсыныстарын жинады. Барлығы 174 ұсыныс келіп түсті, оның 150-ден астамы ведомствоның 7 бұйрығына өзгеріс енгізуге, қалғаны Үкімет қаулыларына, 2 кодекске және қолданыстағы 5 заңға қатысты. Ұсыныстардың көбі арнайы әлеуметтік қызметтер көрсету стандарттарының өзгеруіне байланысты. Мысалы, МӘМ қызметтерін алушылар үшін киім, аяқкиім, төсек-орын және жеке гигиена заттарының ең төменгі нормасын арттыруға және қолдану мерзімін қысқартуға қатысты ұсыныстар бар. Арнайы әлеуметтік қызметке жүгінген кезде ұсынылатын құжаттар тізімін оңтайландыру, мекемеден шығару ережесін қайта қарау, МӘМ қызметкерлерінің міндеттерін нақтылау жөнінде басқа да ұсыныстар түсті. Бұл ұсыныстар мұқият қаралады.
Бүгінгі таңда Қазақстанда 12 мыңға жуық әлеуметтік қызметкер жұмыс істейді, олардың 10 мыңы МӘМ аясында қызмет көрсетеді. Форум барысында әлеуметтік қызметкерлердің кәсіби әдебі жөніндегі әдістемелік ұсыныстар таныстырылды. Құжат қызмет алушыларға, әлеуметтік қызметкерлердің мінез-құлқына қатысты 5 тараудан тұрады. Ұсыныстарда әлеуметтік қызметкерлердің әдеп қағидалары мен негізгі мінез-құлық стандарттары көрсетілген. Жақын арада бұлар іс жүзінде енгізіледі.
Форум барысында әлеуметтік қызметкер мәртебесін көтеру мәселесі де айтылды.
«Мемлекеттік деңгейде олардың құзыреті мен маңызын арттыру қажет. Мысалы, Еңбек кодексіне жұмыскерлердің жекелеген санаттарының еңбегін реттеу туралы бөлім енгізуге болады. Әлеуметтік қызметкерге еңбек нарығында мәртебе мен кепілдік берілуі керек. Әлеуметтік қызметкерді және оның отбасы мүшелерін әлеуметтік қамтамасыз ету қажет. Біз оларды тиісті әлеуметтік қорғау арқылы ғана әдеп қағидаларының сақталуын талап ете аламыз», деді Президент жанындағы Әйелдер ісі және отбасылық-демографиялық саясат жөніндегі ұлттық комиссияның төрайымы Ләззат Рамазанова.
Бұған дейін МӘМ жұмысын жақсарту мақсатында облыстар мен республикалық маңызы бар қалалардың әкімдіктеріне 22 тармақтан тұратын шараларды қабылдау ұсынылды. Оның ішінде қоғамдық кеңестер құру, ашықтық қағидатын енгізу, қызмет алушыларды ғаламтормен қамтамасыз ету, барлық мекемені бейнебақылаумен қамту, камералардағы жазбаларға қызмет алушылардың туыстарына қолжетімділікті қамтамасыз ету, қажет болған жағдайда күрделі және ағымдағы жөндеу жұмыстарын жүргізу, шалғай ауылдарда орналасқан мекемелерді қалалар мен аудан орталықтарына көшіру және мекемелер жұмысын жақсарту жөніндегі басқа да шаралар бар.
Әлеуметтік қызметтер саясатын дамыту департаментінің директоры Дәмежан Сәдуақасованың айтуынша, МӘМ жұмысында шағымдарды талдау мен кері байланыс орнатуға ерекше көңіл бөлінеді.
«Шағымдар мен өтініштер негізінде, оның ішінде әлеуметтік желілер бойынша тәуекелдер картасын жасау керек. Тәуекелдер картасы олқылық анықталған өңірде ғана емес, алдын алу мақсатында басқа өңірлерде де жасалуы қажет», деді Дәмежан Сәдуақасова.
Өткен кезең ішінде мерзімі аяқталуға жақын ұсыныстарды орындаудың оң үрдісін көруге болады. Бұл тұста ұсыныстардың орындалуының ең жоғары пайызы Ақмола, Ақтөбе, Жамбыл, Қостанай облыстарында және Нұр-Сұлтан қаласында байқалды. Ұсыныстарды іске асыру нәтижелері бойынша арнайы әлеуметтік қызметтер ұсынатын 113 орталықтың 74-і wi-fi бар ғаламтормен қамтамасыз етілген. Бұл мекемелердің барлығында қоғамдық кеңес құрылды, әлеуметтік желілерде аккаунттары ашылды. 95 МӘМ бюджеті ашық түрде жарияланды. МӘМ басшылығы мен қызметкерлері қамқорлықтағы жандардың жақындарымен тығыз байланыс орнатқан.
«Біздің міндетіміз – ашықтықты арттыру, қызмет алушылармен жұмыс сипатын өзгерту. Бұл үшін бюджет ашықтығын қамтамасыз ету, МӘМ жағдайын егжей-тегжейлі қарау және орталықтар ұсынатын қызметтердің сапасын арттыру мәселелерін көтеру қажет. Барлық ұсыныстың орындалуын бақылау – қазіргі кезде Еңбек, әлеуметтік қорғау және көші-қон комитеті, сондай-ақ аумақтық департаменттер алдында тұрған басты міндет», деді Е.Әукенов.
Қызмет алушылардың өмір сүру сапасын жақсартуға бағытталған ұсыныстарды орындау бойынша жұмыс жалғасады. Еске сала кетейік, бүгінде елімізде стационарлық типтегі 113 медициналық-әлеуметтік мекеме бар, онда 21 мыңнан астам қызмет алушы тұрады.
