#3ZHAŃAÁDET челленджі

Қоғам • 03 Тамыз, 2020

3ZHAŃAÁDET челленджі

67 рет көрсетілді

#3zhańaádet челленджі «Атамекен» ұлттық кәсіпкерлер палатасының бастамасымен халық және бизнес өкілдерінің арасында санитарлық нормалар мен әлеуметтік қашықтықты сақтауды насихаттау мақсатында шілде айының ортасында қолға алынған болатын. Содан бері оны қызу қолдаған қауымның қарасы қалың.

Арнұр АСҚАР

Челленджге белгілі спортшылар, журналистер, блогерлер мен шоу-бизнес өкілдері қолдау көрсетті. Бұл қатарда Серік Сапиев, Қымбат Досжан, Ғалым Байтоқ, Қайрат Әділгерей, саясаткер Ерлан Сайыров, сондай-ақ белгілі кәсіпкерлер мен палата қызметкерлері бар. Кәсіпкерлер аталған әлеуметтік марафонға қатысып қана қоймай, сондай-ақ өз ресурстарын қолданып жатыр.

23 шілдеде солтүстік өңірдің дүкен сөрелерінде азаматтарды маска кию, әлеуметтік қашықтықты сақтау, қолды жиі жуып тұруға шақыратын стикер жапсырылған жұмыртқа қораптары пайда болды.

#3zhańaádet жалпыұлттық челленджін «Фирма Алекри» ЖШС да қолдады. Ақпараттық жапсырмалары бар өнім «Семейный» супермаркеттері желісінде сатылымға шықты. Солтүстік Қазақстан облысының Кәсіпкерлер палатасының директоры Арман Оразғұловтың айтуынша, пандемия жағдайында мұндай профилактикалық шаралар әр адамның өмірлік нормасына айналуы тиіс.

– Бүгінде бизнес пен қоғам қиын жағдайда қалғаны белгілі, осы жағдайдан барынша тез шығып, қалыпты өмірге оралуымыз сіз бен бізге байланысты. Осыған орай солтүстікқазақстандықтарды санитарлық нормаларды сақтауға шақырамын. Біріншіден, әрине, қоғамдық жерлерде маска кию, әлеуметтік қашықтықты ұстану және қолды жиі жуып жүруге шақырамыз, – дейді Арман Оразғұлов.

«Алекри» құс фабрикасы – Солтүстік Қазақстан облысында ғана емес, сондай-ақ басқа өңірлер мен көрші елдерге сапалы өнім жеткізетін жұмыртқа өндіруші ірі компания. Жыл сайын кәсіпорын 150 млн дана жұмыртқа мен 300 тонна құс етін шығарады.

– Біз қашан да саламатты өмір салтын қолдаймыз. Ал қазіргі жағдайда денсаулығымыз, бүкіл адамзат саулығы, демек экономиканың дамуы мәселесі бірінші кезекте тұрған шақта мұндай профилактикалық шаралар ешқашан артық болмайды. Осы әдеттер бойға неғұрлым тез сіңсе, қалыпты өмірге соғұрлым тез ораламыз. Сондықтан барша адамды қоғамдық орындарда маска кию, екі метрдей арақашықтық сақтау, қолды сабынмен жуып тұру сынды қарапайым қауіпсіздік шараларын ұстануға шақырамын. Сонымен қатар әріптестерімді, кәсіпкерлерді осы акцияға атсалысуға шақырамын, – дейді «Фирма Алекри» ЖШС директоры Александр Прядко.

Кәсіпкерге «Семейный» супермаркеттер желісінің өкілдері де қолдау білдіріп, сыртында үндеу жапсырмалары бар жұмыртқа қаптамалары супермаркет сөрелеріне қойылды.

Мұндай стикерлер Батыс Қазақстан облысында «Алтындар» супермаркетінде отандық өндірушілер өнімдері қаптамаларында да пайда болды. «Атамекен» ҰКП бастамасын «Белес» агрохолдингі, «Теректі май комбинаты» ЖШС, «Нұржанар» АҚ және «Родник» фирмасы қолдады.

– Қалыпты өмірге, бұған дейінгі тыныс-тіршілігімізге тез оралғымыз келеді. Бәрі өз қолымызда, көп нәрсе өзімізге байланысты. Батыс Қазақстан халқын санитарлық нормаларды ұстануға үндейміз. Жеке гигиенаның қағидаларын елемеуге болмайды. Осы жаңа үш әдет өмірдің салтына айналсын», – деп атап өтті Батыс Қазақстан облысы Кәсіпкерлер палатасының директоры Бақдәулет Ибраимов.

#3zhańaádet жалпыұлттық челленджі халық және бизнес арасында санитарлық нормаларды насихаттауға бағытталған. Қазіргі таңда пандемия жағдайында үш қарапайым әдетті сақтау аса маңызды. Бірінші – әлеуметтік қашықтықты сақтау. Екінші – маска және қолғап кию. Үшінші – қолды жиі жуып, антисептикпен зарарсыздандыру.

Күннің маңызды және өзекті жаңалықтарын «Егемен Қазақстан» телеграм каналынан оқыңыз