Батыс Қазақстанда 17 мыңнан аса оқушы оффлайн оқығысы келеді

Білім • 04 Тамыз, 2020

Батыс Қазақстанда 17 мыңнан аса оқушы оффлайн оқығысы келеді

85 рет көрсетілді

Батыс Қазақстан облыстық білім басқармасының басшысы Айгүл Мыңбаева алдағы жаңа оқу жылының ерекшеліктері, оған дайындық туралы айтып берді деп хабарлайды Egemen.kz

Қазбек ҚҰТТЫМҰРАТҰЛЫ

Айгүл Әділгерейқзының айтуынша, облыста жаңа 2020-2021 оқу жылына дайындық жүйелі жүріп жатыр.

– Мектептердегі оқыту форматын анықтау, оқушылар мен педагогтарды компьютермен қамтамасыз ету бағытындағы шаралар жасалуда. Алдын ала жасалған талдауларға байланысты эпидемиологиялық жағдайы тұрақты шалғай ауылдық елді мекендердің мектептерінде балаларды штаттық режимде, яғни әдеттегідей оқыту жоспарланған, – деді басқарма басшысы.

Яғни шалғай ауылдардағы шағын 220 мектепте қоңырау соғылып, 16251 оқушы қадімгідей партада отырып білім алмақ. Әрине, ол жерлерде сақтық, қауіпсіздік шаралары барынша қатаң сақталатын болады.

Дегенмен, оқушылардың дені облыс орталығында, ірі елдімекендерде тұрады. Сондықтан қалаларда және оқушы контингенті көп ауылдық мектептерде қашықтықтан оқыту қарастырылған. Мұндай 160 мектепте 90 425 оқушы оқиды.

– Өткен оқу жылының соңғы тоқсанындағы тәжірибе көрсеткендей, бастауыш сынып оқушылары үшін қашықтан оқудың қиындығы байқалды. Ата-аналар ұл-қызының барынша қауіпсіздік шараларын сақтап, мектепте оқығанын қалап отыр. Сондықтан қашықтан оқытылатын мектептерде бастауыш сыныптар үшін кезекші сыныптар ашу жоспарлануда. Бұл дегеніңіз – 1376 сынып, 17 мыңнан астам оқушы, – дейді Айгүл Мыңбаева.

Қашықтан оқудың сапасы білім ордаларының техникалық мүмкіндігіне тікелей байланысты. Сондықтан мектептердегі компьютерлік құрылғыларды жаңарту қолға алынған. Облыс бойынша биыл үнемделген қаражат есебінен 1454 компьютер алынған екен. Қосымша 1922 компьютер сатып алу жоспарланыпты. Ал аз қамтылған, көпбалалы отбасы оқушылары былтырғыдай мектеп компьютерлерімен уақытша қамтамасыз етіледі.

Тағы бір күрделі мәселе – мектептердің интернет жылдамдығын көтеру. Басқарма басшысының айтуынша, қашықтан оқытылатын барлық мектепті интернет платформаларына қосу бойынша тиісті орындармен келісім шарт жасалып жатыр екен. Педагогтардың ІТ құзыреттілігін арттыру, түрлі интернет платформаларды пайдалану, білім алушылармен кері байланысты тиімді ұйымдастыру мақсатында оқыту семинарлары жүргізілмек. Пән мұғалімдерін әдістемелік қолдау мақсатында барлық пән бойынша тірек конспектілер мен бейне контенттер дайындалып жатыр.

– Облыстың 12 262 педагогы Қазақстан Республикасы Білім және ғылым министрлігі ұйымдастырған қашықтан оқыту мәселелеріне арналған курста оқыды. 2020-2021 оқу жылына оқулықтар мен оқу-әдістемелік кешендермен қамтамасыз ету мақсатында жергілікті бюджеттен 2839,5 млн. теңге қаражат бөлінді. Бұл қаржының 39,3 млн теңгесі бұл оқулықтарды әр мектепке, әр оқушыға жеткізу үшін тасымалдау шығындарына қарастырылды, – дейді Айгүл Мыңбаева.

Айтпақшы, биыл Батыс Қазақстан облысында 32 білім беру нысанын күрделі жөндеу үшін 9,4 млрд теңге бөлінген болатын.