Елордада 2996 ҮЕҰ тіркелген. Белсенді қызмет етіп жатқан 620 ұйым бар. Оның ішінде 10 ұйым әлеуметтік кәсіпкерлікпен айналысады.
"Былтырмен салыстырғанда биыл әлеуметтік кәсіпкерліктің саны артып келеді. Мәселен, 2019 жылы 1 ғана әлеуметтік кафе болса, биыл тағы бір кафе өз қызметін бастады. Ал шеберханалар саны 2019 жылы 6 болса, 2020 жылы 10-ға жетті", дейді қалалық Ішкі саясат басқармасының үкіметтік емес сектормен жұмыс бөлімінің басшысы Нұрбек Пұсырманов.
Мәселен, Нұр-Сұлтанда былтыр ашылған «Еmoji» кафесі мүмкіндігі шектеулі жандарға көмек көрсетуді мақсат тұтады.
"Бүгінде кафелердің қызметіне шектеу қойғаннан кейін, онлайн жеткізу бойынша қызмет етіп жатырмыз. Қазіргі таңда 11 адам жұмыс істейді. Карантин талаптары сақталады. Өзім медицина қызметкері болғандықтан, сақтық шараларын қатаң сақтаймын. Дезинфекция жасалып, температура өлшенеді. Ұжымда көбіне есту қабілеті төмен жандар жұмыс істейді. Олар бірін-бірі жақсы түсінеді, жұмыс жасау да өздеріне ыңғайлы", деп атап өтті "Еmoji" кафесінің басшысы Азамат Базылов.
Бүгінгі таңда әлеуметтік кәсіпкерлік мемлекет тарапынан қолдау тауып келеді. "Бизнестің жол картасы – 2020" мемлекеттік бағдарламасы бойынша биыл бөлінген қаржының 20%-ы әлеуметтік кәсіпкерлікті қолдауға бағытталған. Қазіргі кезде грант иелену үшін құжаттар қабылдануда. Жеке кәсіпкер Темірлан Орманқұлов қалай грант ұтып, өз ісін ашқанын айтып берді.
"Мен өз жобамды қорғаған кезде қатты уайымдадым. Бірақ грантты жеңіп алғаннан кейін, дыбыс жазу студиясын ашу үшін өзім қалаған қажетті жабдықтарды сатып алдым. Бұл біздің жұмысымызды дамытуға және жеделдетуге, ең бастысы жақсартуға мүмкіндік берді. Клиенттер көп болды, оның ішінде ірі компаниялар да бар", дейді Т.Орманқұлов. Ол алда фотостудия құру және оны одан әрі кеңейтуді жоспарлап отыр.
"Біз жастар үшін жаңа жұмыс орындарын ашқымыз келеді", деп атап өтті жас кәсіпкер.
