Екі боксшы арасындағы айқас он раундқа жоспарланған болатын. Алайда жекпе-жек соңғы раундқа дейін жалғасқанымен жерлесіміз оныншы раундтың бел ортасынан ауғанда Камиль Соколовскийді (9-17-2) сұлатып салды. Польшалық боксшы Жанның ауыр соққысынан кейін есін жия алмаған соң төреші кездесуді мерзімінен бұрын аяқтауға мәжбүр болды. Сондай-ақ Соколовский бесінші раундта да бір рет нокдаунға түскенімен, тез есін жиып үлгерген еді.
Осылайша Жан Кособуцкий өзіне тиесілі IBO Inter-Continental белбеуін бірінші рет қорғады. Бұл Кособуцкийдің кәсіпқой бокстағы 13-ші нокауты және 14-ші жеңісі. Ал қарсыласы 18-рет жеңілістің кермек дәмін татты.
2017 жылдан бастап кәсіпқой бокста өнер көрсетіп келе жатқан отандасымыз осымен тоғызыншы жекпе-жегін Беларусь жерінде өткізді. Сонымен қатар бүгінге дейін екі рет Ресейде, бір мәрте – Украина, Германия және БАӘ елінде шаршы алаңға шыққан.
