Ақпараттық ағарту штабы онлайн жұмыс жүргізеді

Қоғам • 06 Тамыз, 2020

Ақпараттық ағарту штабы онлайн жұмыс жүргізеді

67 рет көрсетілді

Түркістан облысында Сыбайлас жемқорлыққа қарсы іс-қимыл агенттігінің бастамасымен халықпен сындарлы сұхбат құру және ақпараттандыру шаралары арқылы тұтастық қағидаларын кеңінен дамыту мақсатында арнайы құрылған облыстық ақпараттық-ағарту штабы жұмыс істейді.

Egemen Qazaqstan

Штаб құрамында тарихшы, айтыскер ақын, заңгер, журналист, мәдениет қайраткері, аға оқытушы азаматтардан құралған облыстың зиялы азаматтары бар. Бүгінге дейін ақпараттық үгіт-насихат тобы облыс аумағында мемлекеттік мекеме қызметкерлері және ауылдық округтерде сонымен қатар құқық қорғау, денсаулық сақтау, білім беру, спорт, мәдениет, кірістер саласы мекемелерінде бес мыңнан аса азаматты қамтыған 70-ке жуық кездесу өткізді. Сондай-ақ штаб мүшелерімен Кентау қаласына қарасты Шорнақ және Қарашық ауылдық округтерінде қоғамдық қабылдаулар ұйымдастырылды.

Кездесулердің негізгі мақсаты – сыбайлас жемқорлыққа қарсы мәдениетті қалыптастыру және қоғамдағы ашықтықты қамтамасыз ету, мемлекеттік орган мен қоғам арасындағы кері байланысты орнату және кең ақпарат тарату арқылы адалдық, әділдік, парасаттылық қағидаларын қалыптастыру екендігін жан-жақты түсіндіру. Сонымен қатар, төтенше жағдай кезінде сыбайлас жемқорлық көріністерін болдырмау болып табылады.

Мемлекет басшысының Жарлығымен ел аумағында коронавирус жұқпалы дертінің тарауына байланысты енгізілген карантин жалғасуда. Осыған орай барлық түсіндіру шаралары онлайн режимде жүргізілуде. Сондықтан ақпараттық ағарту штабының да алдағы жұмыс жоспарына өзгерістер енгізіліп, мемлекеттік органдар мен мекемелердің, денсаулық сақтау ұйымдарының өкілдерінің, халықты әлеуметтік қамсыздандыру мекемесі мен Полиция департаментіне қарасты мекеме қызметкерлерінің қатысуымен тұрмыстық жемқорлықтың алдын-алу бойынша ақпараттық кездесулер онлайн режимде өткізіледі. Сонымен қатар, аудандар мен қалаларда ақпараттық ағарту штабы мүшелерінің қатысуымен көшпелі кездесулер, қоғамдық қабылдаулар ұйымдастыру жоспарланып отыр. Түркістан облысындағы әкімдердің идеология саласына жауапты орынбасарларының және білім беру ұйымдарының басшыларының қатысуымен "Жемқорлықсыз қоғам – сенімді болашақ" тақырыбында онлайн кездесулер ұйымдастырылатын болады. Қазіргі таңда ақпараттық ағарту штабының жұмыстары бұқаралық ақпарат құралдарында кеңінен жарық көруде. Instagram әлеуметтік желісінен арнайы парақша ашылып, іс-шаралар релизі мен фотосуреттері күнделікті жариялануда. Алдағы уақытта штаб мүшелерімен аталған бағыттағы жұмыстар жүйелі түрде жалғасын табады.

Үмбет ЖҮСІПБАЕВ,

Түркістан облыстық маслихат депутаты,

облыстық ақпараттық ағарту штабының мүшесі.

Күннің маңызды және өзекті жаңалықтарын «Егемен Қазақстан» телеграм каналынан оқыңыз