Футбол • 11 Тамыз, 2020

Жаңа маусымдағы өзгерістер

6 рет көрсетілді

Бұл күндері пандемияға байланысты футболдан кейінге қалдырылған Еурокубок бәсекелері өтіп жатыр. Ал 14 тамыздан бастап Еурододаның жаңа маусымына «старт» беріледі. Биылғы бәсекеде ел намысын Чемпиондар лигасында әдеттегідей елорданың «Астана» (бірінші іріктеу кезеңі) клубы қорғаса, Еуропа лигасында Алматының «Қайрат», Шымкенттің «Ордабасы» (екеуі де бірінші іріктеу кезеңі) және Қызылорданың «Қайсар» (екінші іріктеу кезеңі) командалары бақ сынайды.

Жуырда УЕФА биылғы кубок бәсекелерін бастамай тұ­рып, пандемияға байланысты Чем­пиондар лигасы мен Еуропа лигасының ұйымдастырылу барысына бірқатар шектеулер мен жаңа өзгерістер енгізді. Мәселен, УЕФА Еурокубок бәсекелеріндегі әрбір іріктеу кезеңінің жеребе тарту рәсімі алдында бәсекеге қатысатын команданың еліндегі эпидемиялық жағдайды, мем­лекеттегі шектеу туралы мәлі­меттерді жариялап отырады.

Ал елдегі шектеулерді турнирге қа­тысушы командалар УЕФА-ға хабарлап отырады. Егер клуб көрсетілген мерзімде УЕФА әкім­ші­лігіне тізімінде көрсетіл­ген­дерден басқа жаңа шектеулер бар екендігі туралы хабарламаса және мәліметті жасыра отырып матч­ты ұйымдастыруға әрекет етсе, УЕФА-ның Бақылау, этикалық және тәртіптік комитеті сол елдің командасына техникалық (0:3 есебімен) жеңіліс береді. Сон­дай-ақ егер үкімет тарапынан мем­лекетке кіруге шектеу қойыл­ған болса, клуб матчты бейта­рап алаңда өткізе алады. Тек жағ­дайды алдын ала УЕФА-ға хабарлап, қай елде өткізгісі келетінін ұсы­нуы керек. Егер клуб иесі балама нұсқаны ұсына алмаса, ойын туралы шешімді УЕФА әкім­шілігі қабылдайды. Бірақ бұл клуб кездесуді ұйымдастыруға жауап­ты болады, ал барлық шығын­дарды екі қарсылас өз мойнына алады. Егер олардың біреуі ойынға қатысудан бас тартса, онда 0:3 есебімен жеңіліс жариялайды.

Осыған орай бірер күн бұрын қазақстандық клуб­тар коронавирусқа байланысты форс-мажор жағдай­ында Чемпиондар лигасы мен Еу­ропа лигасының үй матчтарын Грузияда өткізуі мүмкін деген ақпарат жарияланды. Мұны Гру­зия футбол федерациясының прези­денті де растап отыр.

«Егер екі тараптың бірі өз ойынын елінде өткізе алмаса, УЕФА-ның жаңа ережесі бойынша бас­қа елде өткізуге міндетті. Осы жағдайға байланысты біз УЕФА-ға кейбір матчтарды ұйымдастырып бере алатынымызды мәлімдедік. Біздің елде қай елдің командалары ойнауы мүмкін? Мысалы, қазір Қазақстанда эпидемиялық жағдай қиын. Егер Қазақстан командалары қарсыластарын елдерінде қабылдай алмаса, онда біз бұл мүмкіндікті қарастырамыз. Бұл біздің еліміздің имиджіне оң әсер етеді»,  деді Кобиашвили.

Әдетте, Еурокубок матчтары үй­дегі және сырттағы деп екіге бөлі­нетін. Биылғы жағдайға байланысты кездесулер екі емес, тек бір матчтан тұрады (Чемпиондар лига­сының төртінші іріктеу кезе­ңінен басқа іріктеулер). Сон­дық­тан биыл кей матчтарды өз алаңында өткізетін команда жеребеден кейін 24 сағат ішінде УЕФА әкімшілігіне ойынның қай жерде өтетіні, қай күні және қай уақытта басталатыны туралы жазбаша растау жіберуі керек. Дәл осындай дерек­терді қарсылас клубқа да беру міндетті.

Егер УЕФА әкімшілігі енгі­зіл­ген шектеулер туралы ақпаратты дұрыс емес немесе жеткіліксіз деп санаса немесе бұл шектеулер матч­ты бейтарап алаңға, басқа елге ауыстыру үшін жеткіліксіз болса, соңғы шешім УЕФА әкімшілігінде қалады. Бұл жағдайда алаң қо­жайыны саналатын клуб кездесуді ұйымдастыруға және барлық шығындарға жауап береді. Егер қарсыластардың бірі ойынға қаты­судан бас тартса, оған 0:3 есебімен жеңіліс береді.

Жеребе тартылып, матч алғаш­қы команданың елінде өтуі керек болып, алайда белгілі септер­мен бұл ойынды өз елінде ұйым­дастыра алмайтын болса клубтар өзара келісіп (УЕФА мақұл­дауы­мен), матчтың өткізілетін орнын ауыстыра алады.

Егер матчты қабылдайтын команда УЕФА-ға ойыннан екі күн бұрын елдегі жағдайдың тұрақты екенін мәлімдеп, алайда кездесуге бір күн қалғанда немесе матч күні мемлекеттік немесе жергілікті билік органдары спорттық жарыс өткізуге шектеу енгізсе, ел би­­лігі күнтізбеге сәйкес матчты өт­к­і­зуге кедергі келтіргені үшін шек­­теу енгізген елдің клубына 0:3 есе­бімен жеңіліс беріледі.

Егер жоғарыда аталған жағ­дай­ларда екі клуб та ойнаудан бас тартса немесе ойынның өтпеуіне кінәлі деп саналса УЕФА оларды Чемпиондар лигасының және Еуропа лигасының 2020/21 жылғы маусымынан шеттетеді.

Командалар матчтан бір күн бұрын коронавирустың бар-жо­ғын анықтайтын тест тапсырады. Егер тест оң нәтиже берсе УЕФА жергілікті үкіметтің шеші­мін күтеді. Егер командада 13 фут­болшы вирустан дін аман болса, жер­гілікті үкімет матч өткізуге рұқ­сат берсе, ойын өтеді. Ал рұқ­сат бермеген жағдайда УЕФА ойын өтетін күнді басқа уақытқа кө­шіруі мүмкін. Тіпті матч уақы­тын ауыстыруға мүмкіндік болмаса, сол ойында алаң қожайыны саналған клубқа техникалық жеңіліс жазылады.

УЕФА бекіткен мерзім бо­йынша, Чемпиондар лигасының електік кездесулері 14 тамызда, бірінші іріктеу кезең 21 тамыз­да, екінші іріктеу кезең 11 қыр­күйекте, үшінші іріктеу кезең 18 қыркүйекте ойналады. Ал төртінші іріктеу кезеңінің алғашқы матчы 25 қыркүйекке, қарымта кездесуі 1 қазанға жоспарланған.

Еуропа лигасының матчтары мына күнтізбелік уақытта өте­ді: алғашқы електік кезең 22 та­мызда, бірінші іріктеу кезең 12 қыркүйекте, екінші іріктеу кезең 19 қыркүйекте, үшінші ірік­теу кезең 26 қыркүйекте және төртінші іріктеу кезеңі 2 қазанда ұйымдастырылады.

Соңғы жаңалықтар

Шәміл

Тарих • Кеше

ZOOM акциялары қымбаттады

Технология • Кеше

Ұқсас жаңалықтар