Айтуынша, жақында ғана ол "Қазпошта" арқылы Нұр-Сұлтан қаласындағы қаржы ұйымы нотариусынан хат алған.
– Хатта менің Нұр-Сұлтандағы "Шағын қаржы ұйымына" 20 күн мерзімге 30 мың теңге көлемінде несие ресімдегенім жазылыпты. Өз басым астана тұрмақ, Қостанайдың өзінде ешбір несие алып көрген емеспін. Интернетті ақтарып отырып, әлгі ұйымның телефон нөмірін тауып алдым. Бірақ ешкім жауап бермеді. Одан кейін хаттан нотариустың байланыс нөмірін тауып, хабарласып едім, ол маған арызданушының нөмірін берді. Арызданушының айтуынша, мен шілде айының бесі күні несие ресімдеппін. Мен ешбір несие ресімдемегенімді айтпақ болып едім, оператор телефон тұтқасын қоя салды. Енді мен несие төлемін уақытында өтемегенім үшін негізгі қарыздың үстіне өсімпұл үстеп, 45 232 теңге төлеуім керек. Онша көп ақша емес, бірақ мен оны алған жоқпын. Сонда, не үшін төлеуім керек? Банктің өзі несие ақша аударылған есепшотты тексеріп, ақшаның кімнің қалтасына түскенін оп-оңай анықтай алады ғой, - деді Б. Әлекенова.
Айдаладағы әлдекімдердің алаяқтық әрекетінің құрбанына айналған Балсұлу қазір полицияға шағым түсіріп, нотариусқа қарсы хат дайындап жатыр.
- Полицияға шағымданып едім, олар мұндай қылмыс түрлерін ашу мүмкін емес деп отыр. Интернет алаяқтарының құрығына түскен шағымданушылар менсіз де көп екен. Енді нотариустың хатына қарсы хат жазып, адвокат жалдауға тура келеді. Бірақ мұның бәріне ақша керек. Бүйтіп әуре болғанша, қаржы ұйымы талап етіп отырған ақшаны төлеп құтылу жеңіл шығар деп те ойлап қоямын. Қазіргідей онлайн әлемде біздің жеке мәліметтерімізді алаяқтар оп-оңай өз мүдделеріне пайдалануда. Сондықтан жеке куәлікте көрсетілген мәліметтеріңізді құпия сақтауға тырысыңыздар, - дейді Балсұлу. Әділдік іздеп, әуре-сарсаңға түскен Балсұлу «Қазпоштадан» интернет алаяқтарының торына түскен өзі сияқты тағы бір тұрғынды кездестіргенін айтады. Ол азаматша да ақысын өз есебінен төлеп нотариуске қарсылық хатын жіберіпті. Адвокаттың қызметі 50 мың теңге тұрады екен. Алаяқтар бұл қыздың атына 2 бірдей несие ресімдеп жіберген. Басына ашық күнде жай түскендей болған Балсұлу бір жарым күннің ішінде шағын несие беретін ұйымдардың немесе әлдебір алаяқтардың құрбанына айналған 5 адамды іздеп тапқан.
Қостанай облысы
