Білім • 13 Тамыз, 2020

Үш жаңа мектеп пайдалануға беріледі

290 рет
көрсетілді
2 мин
оқу үшін

Облыс әкімі Архимед Мұхамбетов өңірлік коммуникациялар қызметі алаңында аймақтың жаңа оқу жылына дайындығы туралы есеп берді. Әкімнің айтуынша, биыл Қостанай облысында орта білім беру елдегі санитарлық-эпидемиялық жағдайға байланысты бірнеше бағытта ұйымдастырылатын болады.

Үш жаңа мектеп пайдалануға беріледі

Бүгінде облыста 490 мектеп жұ­мыс істейді. Биылғы оқу жылында 12 мың­нан астам бала алғаш рет мектеп табал­дырығын аттайын деп отыр. Жаңа оқу жылы жалпы аймақ мектептерінде 108,6 мың бала оқиды деген болжам бар. 16 мың бала дәстүрлі түрде мектеп қабыр­ғасында оқымақ. Ал 27 мың оқу­шы кезекші сыныптарда, 65 мың шә­кі­рт қашықтықтан білім алатын болады.

Биыл ауылдық мекендердегі шағын жинақты мектептерді қос­пағанда, барлық мектептер жаңа оқу жылын қашықтан оқыту жүйесі арқылы бастамақ. Облыста 18,6 мың оқушыны қамтитын 330 шағын жинақты мектеп бар. Оның ішінде жалпы саны 16 мыңнан астам оқушы бар 265 мектеп санитарлық-эпидемиялық қауіпсіздік шараларын күшейте отырып, штат­тық режімде оқитын болады. Бұл мек­тептердегі оқыту екі ауысымда ұйымдастырылады, ауысымдар арасында бір жарым сағат үзіліс болады, желдету режімі қатаң сақталады және әр сабақтан кейін дезинфекция­лау жүргізіледі. Мектептерде маска­лық режім енгізіліп, медициналық бақы­лау күшейтіледі.

Ауылдардағы шағын комплектілі мектептердің оқушылары сол елді мекендердің эпидемиялық ахуалы тұрақтанған жағдайда ғана мектепке барып оқиды. Егер жағдай ушығып жатса, облыстың білім беру жүйесі толықтай қашық­тан оқыту режіміне көшеді. Қалған 225 мектептегі оқу үдерісі қашықтан ұйымдастырылады. Бұл мектептерде жалпы саны 92,5 мың оқушы бар.

– Қашықтан оқытуды ұйым­дастыру үшін биыл жазда 1,4 млрд теңгеге 6 мың компьютер сатып алынды. Бұл облыстың білім беру ұйымдарының компьютерлік паркін 50%-ға жаңартуға мүмкіндік берді. Мұның сыртында, Білім және ғылым министрлігі үкіметтік резервтен жалпы сомасы 2,4 млрд теңгеге 15 мыңнан астам компьютерлік тех­никаны сатып алуға қосымша қара­жат бөлуді қарастырып жатыр. Мұғалімдер мен оқушыларға, бірін­ші кезекте әлеуметтік осал топ­тарға жататын отбасылардағы бала­ларға қайтарылмалы негізде 11188 компьютерлік техника берілді, – деді А.Мұхамбетов.

 

Қостанай облысы