Францияның ПСЖ командасы Чемпиондар лигасының жартылай финалына алғашқы болып шықты. Ширек финалда париждіктер Италияның «Аталанта» клубынан 2:1 есебімен басым түсті.
Жанкүйерлерсіз өткен матчта «Аталантадан» Пашалич (27 мин) қанжығасы майланып, 90-минутқа дейін есеп өзгермеген еді. Алайда ПСЖ айналасы үш минутта «камбэк» жасады. Маркиньос (90 мин.) пен Шупо-Мотин (90+3 мин.) гол соғып, командасын жеңіске жетеледі.
«РБ Лейпциг» сенсация жасап, «Атлетиконы» 2:1 есебімен жеңді.
Ойын басталмас бұрын Egemen.kz сайтына «Лейпцигтің» қандай жағдайда ғана жартылай финалға шығуы мүмкін екенін айтқан едік. «Соңғы бес ойында тек екі рет қана жеңіске жеткен «Бұқаларға» Ла Лигада өз қақпаларына ең аз гол жіберетін командалардың бірі «Атлетикоға» қарсы тұру қиынға соғады. Әйткенмен Юлиан Нагельсманның шәкірттері бірінші болып гол соқса, испан командасын әбігерге түсіретіні сөзсіз. Өйткені «Атлетиконың» қарсылас командаға көп гол соға бермейтіні де бар».
Айтса айтқандай, ширек финалда «Лейпциг» бірінші болып есепті ашты. Ойынның 51 минутында Ольмо есеп ашып, командасын алға шығарды. Араға 20 минут салып «Атлетико» сапынан Португалияның талантты жас футболшысы Жоау Феликс 11-метрлік айып добын сәтті орындап есепті теңестірді. Ал ойынның 88-минутында Адамс бұл кездесуге нүкте қойды. Сол қапталдан әдемі пас алған ол еш ойланбастан қақпаға соққы жасады. «Атлетико» қақпашысы Облак соққыны қайтарар ма еді, егер де доп қорғаушылардың біріне тимегенде. Есеп – 2:1, «РБ Лейпциг» жартылай финалда.
«Барселона» – «Бавария» матчы Лионель Месси мен Роберт Левандовскидің «Алтын допқа» кімнің лайық екенін көрсетіп бергендей. Әрине футбол тарихында аргентиналық футболшының есімі, атақ-даңқы танымал. Бірақ Лиссабонда Левандовский және оның командасы қай кезде де мықты екенін дәлелдей алды.
Бұған дейін қарсыласынан әр таймда 4 гол жіберіп алатын «Барселонаны» бұрын соңды көрмеппіз. Сөз жоқ Месси – феномен! Осындай мықты ойыншысы бар команданы жолдан тайдырған және 8:2 есебімен ойсырата жеңген «Баварияда» «ұят», «аяушылық» жоқ деушілер де табылар. Алайда бұл – футбол. Футболда аяушылық деген болмайды.
Гол соққандар – Алаба 7 (өз қақпасына), Суарес 57 («Барселона») – Мюллер 4, 31, Перишич 21, Гнабри 27, Киммих 63, Левандовский 82, Коутиньо 85, 89 («Бавария»).
Францияның «Лион» командасы Англияның «Манчестер Сити» командасын 3:1 есебімен басым түсіп, жартылай финалға жолдама алған соңғы команда.
Ойын басталмас бұрын бірқатар футбол мамандары Гвардиола баптайтын МС ұжымын үздік төрт команданың қатарына қосып қойған еді. Алайда олардың бұл жолғы болжамын көбінесе қарымта шабуылдармен гол соққан «Лион» күл-паршасын шығарды.
«Лион» бірінші болып есеп ашты. Ойынның 24 минутында Корне айып алаңының сыртында сол аяқпен шірене теуіп, командасын алға шығарды. 69 минутта МС сапынан Бельгия құрамасының тәжірибелі футболшысы Кевин Де Брюйне айып алаңының ішінде қақпаның оң жақ бұрышын дәл көздеп, есепті теңестірді. Ал ойынның 79 және 87 минуттарында француз шабуылшысы Дембеле дубль авторы атанып, бұл кездесуге нүкте қойды. Есеп – 3:1, «Лионның» пайдасына шешілді.
18 тамызда жартылай финалдық матчта «Лейпциг» – ПСЖ өзара мықтыны анықтаса, 19 тамызда «Лион» азулы «Бавариямен» кездеседі.
