Коллажды жасаған Амангелді Қияс, «EQ»
Яғни ғаламтор байланысы адам өмірінде маңызды орын алатын қажеттіліке айналды. Демек, оған деген сұраныс арта түсетіні белгілі. Бұл үрдіс қазір орталық қалалардың аумағынан асып, алыс ауылдарға да жеткені анық. Ал шалғайдағы елді мекендердің кең жолақты интернет байланысына қосылуы күн тәртібіндегі өзекті мәселенің бірі. Басқаша айтқанда, елді қолжетімді байланыспен қамту үшін орасан жұмыс істелуде. Оның нәтижесі де жоқ емес. Бұйырса, жақында Алматы облысының Панфилов ауданындағы ауыл тұрғындары сапалы интернетті пайдаланатын болады.
Қазір Панфилов ауданында 16 елді мекенге жоғары жылдамдықтағы интернет желісі тартылуда. Оның ішнде бұған дейін мүлдем байланыс желісі болмаған бірнеше ауылға ұялы байланыс стансасы орнатылып, интернет желісін қосу жұмыстары жүріп жатыр. Осы тізімде өткен көктемдегі қашықтан оқыту кезінде байланыстың қиындығын сезінген Сарытөбе ауылы да бар екен. Оқырманның есінде болса, сол тұста оқушылар мен студенттер интернетке қосылу үшін биік төбе басына шығып, қолайлы орын іздеп кеткен болатын. Енді осы ауылға «Билайн» компаниясы өз байланыс желісін құрып жатыр екен. Ұялы байланыспен бірге кеңжолақты интернет те қолжетімді болмақ.
Сондай-ақ аудандағы 9 ауылға базалық станса орнатылуда. Бұған дейін мүлдем байланыс болмаған Бөрібай, Ынталы ауылдары қазір «Теле 2», «Билайн» ұялы байланыс операторларының қызметін тұтынуға көшкен. Ал «Қазақтелеком» компаниясына қарасты желілік тораптар бөлімі негізгі 16 елді мекендерге талшықты-оптикалық байланыс желісін тартып жатыр.
– Жоғары жылдамдықтағы интернет желісіне ең алдымен мектеп, медициналық пунктер мен жергілікті әкімдіктер қосылмақ. Бүгінгі таңда 6 елді мекенге кеңжолақты желі тартылды. Қалған ауылдарға желі тарту жұмыстары жақын күндері аяқталады, – дейді «Қазақтелеком» компаниясы Панфилов ауданы бойынша желі тораптарының бөлім басшысы Руслан Құрбанов.
Айтпақшы, жаңа оқу жылында Панфилов ауданында 24 мыңнан астам оқушы қашықтан және онлайн түрде оқымақ. Осыған орай, кейбір ауылдардың интернет, байланыс сапасын арттыру үшін қосымша жылдамдық арттыратын қондырғылар да қойылып жатыр.
Алматы облысы
