АЛҒЫС АЙТАДЫ

Мемлекет басшысы Нұрсұлтан Назарбаевтың атына көктемгі су тасқынынан зардап шеккен Алматы облысы, Қызылағаш ауылының  қарияларынан жеделхат келді. Хат иелері елдің ауызбіршілігі арқасында Қызылағаш ауылының қайта салынып жатқанын, балала­ры­ның жалақысын алатынын, не­ме­релеріне ие болып қалған өзде­ріне жергілікті әкімшіліктің жатар орын, азық-түлік, киім-кешекпен жәрдемдесіп отырғанын айта келе, шынайы ризашылықтарын жет­кізеді. “Қызылағашымызды қайта өмірге әкеліп, денесіне жан бітіріп, тамырларына қан жүгіртіп, жаңадан баспана салып жатқандарға кемпір-шалдар атынан үлкен алғысы­мыз­ды білдіреміз, Сізге зор денсаулық, ұзақ ғұмыр тілейміз. Елімізге жа­саған жақсылығыңыз алдыңыздан шықсын!” – деп Елбасыға тілек тілеп, алғыс айтады хат авторлары. Сонымен қатар, Мемлекет бас­шысы Нұрсұлтан Назарбаевтың атына Алматы облысы, Еңбекші­қа­зақ ауданы, Талдыбұлақ ауылының тұрғыны Қаламқас Оспановадан хат келді. Хат иесі Елбасын алда келе жат­қан Ұлы Жеңістің 65 жылды­ғымен, 70 жылдық мерейтойымен және еліміздің ЕҚЫҰ-ға төраға болуымен құттықтап, игі тілектерін білдіреді. “Сіздің амандығыңыз – біздің басты байлығымыз. Ел үмітін, бабалар аманатын арқалаған иығыңыз талмасын!” деп жазған хат авторы Елбасына ұзақ ғұмыр, зор денсаулық тілейді.