"Бүгінге дейін Армениядан әкелінген 255 көлік құралы тіркелді. Тіркеуге тұрған автокөліктер Қазақстан аумағында, сондай-ақ одан тыс жерлерде еркін жүріп, заңды түрде жыл сайынғы техникалық тексеруден өте алады, сондай-ақ көлікке салынатын жол салығы үшін төлем жасай алады. Көлікті уақытша тіркеу мәселелері бойынша «жедел желі» телефонына 500-ден астам азамат жүгінді. Қазір полиция қызметкерлері түсіндіру жұмыстарын жүргізіп жатыр. Машиналарды тіркеу үшін үш түрлі төлем жасау қажет: тіркеу үшін алым - 695 теңге, техникалық паспорттың бажы - 3 473 теңге және мемлекеттік нөмірге төленетін баж - 7 778 теңге. Төлемнің жалпы сомасы шамамен 12 мың теңге болады, - деді облыстық полиция департаменті бастығының бірінші орынбасары полиция полковнигі Нығмет Исмағұлов.
Қостанайлық кәсіпкер Мырзахан Сейітжанов Армениядан 3 автокөлік айдап әкеліпті. Біреуін өзі мініп, екеуін әйелі мен қызына беріп қойған. – Бұл көліктер маған арзан түсті. Құны нарық бағасынан төмен. Үкіметтің Қауылысы шыға салысымен, елдің алды болып тіркеуге қойдым. 3 машинаны қосқанда барлығы 36 мың теңге төледім. Енді еркін жүре беруге болады. тіркелу мерзімі де аяқталып қалды. Екінші рет мұндай мүмкіндік тумайды, - деді М. Сейітжанов.
Армениядан әкелінген көлік құралдарын тіркеу мерзімі 1 қыркүйекте аяқталады. Көлік құралы тіркеуден өтпеген жағдайда иесі ҚР ӘҚБтК-нің 590-бабының 2-бөлігі бойынша көлігін айыппұл тұрағына қойып, өзі әкімшілік жауапкершілікке тартылады. Тіркелу мерзімі ұзартылмайды.
Қостанай облысы
