Саясат • 19 Тамыз, 2020

«Еңбек» арқылы жұмыспен қамтылуда

11 рет көрсетілді

Биыл 7 айдың қорытындысы бойынша Қазақстанда 743 мыңдай адам мемлекеттік бағдарламалар арқылы жұмыспен қамтылды. Бұл туралы Орталық коммуникациялар қызметінде өткен баспасөз жиынында Еңбек және халықты әлеуметтік қорғау вице-министрі Серік Шапкенов айтты.

Вице-министрдің айтуынша, нәтижелі жұмыспен қамту және жап­пай кәсіпкерлікті дамытуға бағыт­талған «Еңбек» бағдарламасы арқылы қазір 379 мың адам жұмысқа орналас­тырылды. Бұл көрсеткішті 600 мың адамға дейін жеткізу көзделіп отыр.

– «Жұмыспен қамтудың жол картасы-2020» бағдарламасы аясында 255 мың адамды жұмысқа орналастыру жоспарланған. 7 айдың қорытындысына сәйкес, бүгінде 154 мың адам аталған бағдарламаның негізінде еңбек етуде. «Нұрлы жер», «Нұрлы жол» сынды бағдарламалар арқылы 364 мың адамды жұмыспен қамтуды көздеген едік. Қазір осы бағдарламаларды іске асыруға 210 мың адам тартылып, еңбек етіп келеді. Барлығын қоса есептегенде, бүгінде 743 мың адам жұмыспен қамтылып отыр, – деді С.Шапкенов.

Спикер атап өткендей, «Еңбек» бағдарламасын жүзеге асыруға 176 млрд теңге көлемінде қаражат бөлінді. Сондай-ақ Президенттің тап­­сыр­масына сәйкес, бұл жұмыс­тар­ға қосымша 50 млрд теңге қара­жат жұмсалмақ.

«Бағдарламаның бірінші бағыты оқу мәселесімен байланысты. Әри­не азаматтарды кәсіптік біліммен қам­та­масыз етуіміз керек. Бүгінде аз қам­тылған немесе көпбалалы отбасылардан шыққан балалар ҰБТ-ның нәтижесінде жоғары оқу орнына түсе алмай қалған жағдайда оларға тех­никалық және кәсіптік білім бері­­леді. Бұл жұмыс 1 қыркүйектен бас­тап іске аспақ. Қазір 20 600 адам қа­былданды», деді Еңбек және ха­­лықты әлеуметтік қорғау вице-министрі.

Ведомство өкілі қысқа мерзімді оқыту мәселесіне де тоқталды.Оның сөзіне сенсек, үш немесе ал­ты ай көлемінде азаматтарға кәсіп­тік бі­лім беріледі. Бүгінде 11 мың аза­мат оқуға жіберіліп, 200-ден аса адам тұрақты жұмыспен қамтылды.

«Бағдарламаның тағы бір ма­ңызды бағыты – шағын несиелер немесе гранттар ұсыну. Осы рет­те шағын несие мен гранттарды алатын азаматтар «Бастау биз­нес» бағдарламасы бойынша оқы­тылатынын айта кеткен орынды. Биыл 30 мың адамды оқыту жос­пар­ланған еді. Қазір 23 мың адам оқуын аяқтады. Оның 18 мыңы бизнес жобаларын қорғап шығып, 7 мыңға жуық адам шағын несие алды. Осы арқылы 6200 тұрақты жұмыс орны ашылды. 17 200 грант берілді», деді С.Шапкенов.

Бұған қоса жауапты орган өкілі Батыс Қазақстанда шағын несие­ні игеру бойынша теріс нәтиже бай­қалғанын жеткізді. Осы орайда жағымды динамика Шығыс Қазақ­стан облысында және Шымкент ша­һарында тіркелді.

Салалық ведомствоның басшылары жыл соңына дейін елімізде жұмыссыздық деңгейі 6,1%-ды құ­рауы мүмкін екенін айтты.

 

Соңғы жаңалықтар

Қарасу ауданында 39 үйді су басты

Аймақтар • Бүгін, 17:12

Бүгін – экологиялық білім күні

Экология • Бүгін, 15:59

Түркістанға 3000 жыл

Руханият • Бүгін, 12:10

2002 адам коронавирустан емделіп шықты

Коронавирус • Бүгін, 09:32

Сарыала қаздың қаңқылы естілді

Руханият • Бүгін, 08:51

Қор нарығы қымбаттады

Әлем • Бүгін, 08:33

Ұқсас жаңалықтар