Аймақтар • 22 Тамыз, 2020

Облыс бюджетінің 30 пайыздық шығыны білімге жұмсалуда

159 рет
көрсетілді
5 мин
оқу үшін

Президент Қ.Тоқаев мемлекеттік органдардың алдына "халық үніне құлақ асатын мемлекет" қағидатын қалыптастыру міндетін қойғаны белгілі. Қазір халықтың сұранымына "кері байланыс" механизмі  орнатылуда. Осыған орай Солтүстік Қазақстан облысының әкімі Құмар Ақсақалов депутаттардың алдында есеп берді. "Коронавирус пандемиясы бәріміз үшін үлкен сынақ болды. Күнделікті өмірге үлкен өзгерістер әкелді. Барлық салалардың дамуына әсерін тигізді. Әсіресе, қызмет көрсету бизнесі зардап шекті. Мемлекет қиын-қыстау кезеңде тұрғындар мен бизнеске барынша қолдау көрсетті. Экономиканы тұрақтандыру, адамдарды еңбекпен қамту және табысын өсіруге ерекше көңіл бөлінуде", деп бастады өзінің сөзін әкім.

Облыс бюджетінің 30 пайыздық шығыны білімге жұмсалуда

Әлеуметтік-экономикалық дамудың жеті айлық қорытындысы бойынша Солтүстік Қазақстан қазір республикада өнеркәсіптің дамуы бойынша бірінші, ауылшаруашылығы бойынша төртінші инвестиция тарту бойынша үшінші және құрылыс салу бойынша төртінші орынға шықты. Бүгінгі таңда  облыс бюджеті жылдың басындағымен салыстырғанда 64 млрд. теңгеге артып, 324 млрд. теңгеге жеткен.  

Былтырғы қазанда ашылған "Қызылжар" ЕЭА аумағында түрік компаниясы 510 орындық заманауи аурухана салуда. Оның құрылысы 2022 жылы аяқталады деп жоспарланған. Сондай-ақ Alageum Electric компаниясы инвесторы болып табылатын "Петропавл электртехникалық зауыты" іске қосылмақ.  Ал немістің ауылшаруашылы техникаларын шығаратын "CLAAS" компаниясымен келіссөздер жүргізілуде. Бұл келіссөздер іске асса жергілікті аграрийлер неміс техникаларын арзанға алатын болар еді.  

Аймақта кәсіпкерлік те дамып келеді. 2019 жылдан бері "қарапайым заттар экономикасы" бағдарламасы бойынша жеңілдетілген несиелер беру іске асуда. Қазірдің өзінде 18,3 млрд. теңге сұраған 131 жоба мақұлданды. Олар іске асса 650 жаңа жұмыс орны ашылады. Солтүстік қазір тұрғын үй құрылысының бумын бастан кешуде. Биыл 303,4 мың шаршы метр тұрғын үй пайдалануға берілмекші.

Өңір жол мәселесін ауызға алғанда ғана ұятты деуге болады. Бүгінге дейін барлық жолдардың 35 пайызы қанағаттанғысыз жағдайда. Осы мәселені шешу үшін биыл 39,1 млрд. теңге бөлініп, ол бір мың шақырым жолды жөндеуге жұмсалатын болады.

Халықты таза ауыз сумен толық қамтамасыз ету мәселесі де күн тәртібінен түспей келеді. Биыл 288 шақырым су құбырларын жөндеу көзделген. Ол 60 мың тұрғыны бар 76 елдімекенді қамтиды. Бұл іске 8,7 млрд. теңге қарастырылған.

Халықты жұмыспен қамту мәселесі де үнемі назарда. Соңғы үш жылда жұмыспен қамту органдарына 90 мың тұрғын қайрылған, соның 10 мыңға  жуығына жаңа кәсіптерді игеруге жағдай жасалған. 77 мыңы жұмысқа орналастырылып, тағы да 3 мыңдайына өздерінің кәсібін ашуға қол үші берілген. Осы мақсаттарға бюджеттен 32 млрд. теңге жұмсалған екен. Ол 34 мыңға жуық тұрақты жұмыс орындарын ашуға жұмсалған. Биыл 3 мыңға жуық адам жұмысқа орналастырылды.

Білім беру саласына бөлініп жатқан қаражат жыл сайын артып отырады. Егер ол былтыр 18 пайызға көбейсе, биыл ол 32 пайызға артты. Бұл 87 млрд. теңге деген сөз немесе облыс бюджетінің 30 пайызы. Биыл 107 білім беру нысанына түрлі жөндеулер жасалды. Биылғы оқу жылында 2 жаңа мектеп ашылады. Оның 900 орындығы Қызылжар қаласында, 300 орындық біреуі Бескөл ауылында ашылады. Екеуі де қазақ тілінде оқытатын мектептер.

Аймақтық ЖОО-да жақсы жаңалықтар бар. Биыл ондағы студенттер саны 7 мың асты. Бұл 2016 жылмен салыстырғанда 1,8 есе артық. Былтырдан бері медициналық және ауылшаруашылығы профилі бойынша 25 жаңа мамандықтар дайындау қолға алынған. Жаңа оқу жылында грантпен түсетіндер саны 1200 адам.

Денсаулық сақтау саласына 2019 жылдан бері медициналық жарақтар алу үшін 2,4 млрд. теңге бөлініп келеді. Аты жаман вируспен күреске қарсы биыл сатып алынған ӨЖТ аппараттарының саны  112-ге жетті және тағы 111 түспекші. Бес оттегі стансаларының құрылысы басталды.

Облысқа медициналық мамандардың келу тартымдылығын арттыру үшін әлеуметтік пакет бұрынғыдан да жақсартылды. Ауылдық жерлерге баратын дәрігерлерге ол 1,5 млн тегеге жетті. Аудандық әкімдіктер оларды тұрғын үймен толықтай қамтамасыз етеді. 

Солтүстік Қазақстан облысының депутаттары Құмар Ақсақаловтың аузынан осындай деректерді естіп, өңірдің тұрақты даму жолында екендеріне көздері жетіп жақсы көңіл күймен тарасты.

Солтүстік Қазақстан облысы