Аудан орталығы Пресновка селосынан «ВАЗ-2107» көлігімен шыққан 65 жастағы тұрғынға ауыл шетінде екі адам ала кет деп қол көтереді. «Ала кетсем несі бар, әзер болса бензинге ақша табармын» деп ойлаған жүргізуші тоқтап, оларды мінгізіп алады. Кейін белгілі болғанындай жолаушылардың бірі 35, екіншісі 28 жаста екен және екеуі де бұрын сотталған. Екі жолаушы бұған дейін де ішіп алғандарына қарамай, салонның ішінде де арақтан ауыздары босамайды. Шал адамды басынып, машинасын тартып алу да мас бастарына келе қалады. Сөйтіп, оған қоқан-лоқы көрсетіп, машинасы мен телефонын тартып алып, біреуі рөлге отырады. Бірақ арақтың уыты басын алған ол рөлге ие бола алмай, «Новорыбинка» селосының тұсында кюветке түсіп, қамыс басқан көлшікке қойып кетеді. Әйтеуір ешкімге зақым келмей, далаға шығады.
Ашық далаға шыққан соң машинаны иесіне қалдырып, екі мас «Кладбинка» селосына бет алып, өтіп бара жатқан көлікке қол көтеріп, мініп кетеді. Абыройдан әбден айрылған екі мас бұл ауылда дүкенге қарақшылық шабуыл жасайды. Дүкеншіні қорқытып, 44 мың теңге ақшасын тартып әкетеді.
Аудандық полиция бөліміне дабыл осы жерден түседі. Жедел келе жатқан полиция қызметкерлері кюветке түсіп кеткен машина мен оның иесін де жолда көреді.
Жедел іздестіру барысында қылмыскерлер ауыл шетінен табылады, әбден мас болып, сілейіп қалғандарды полиция оңай құрықтаған. Аталған фактілер сотқа дейінгі тергеп-тексерудің бірыңғай тізіліміне Қылмыстық кодекстің «Автомобильді құқыққа сыйымсыз иеленіп алу» және «Қарақшылық» баптары бойынша енгізілді. Қазір ұсталғандар күзетпен қамауда отыр.
