Үшінші экипаждың өнер көрсетуімен Қазақстан, Қырғызстан, Ресей және Өзбекстан командалары үшін жеке жарыс аяқталды.
Бұл жарыста да алдыңғы кезеңдегідей қазақстандық команда екінші уақытты көрсетіп, тек ресейлік танкішілерге есе жіберді. Үшінші орынға Өзбекстан, төртінші орынға Қырғызстан командалары жайғасты.
Қазақстаннан келген жауынгерлер барлық үш сында трассадан өту кезінде жоғары жылдамдықты, сонымен қатар мақсаттардың дәлме-дәл орындалуы мен экипаждардың үйлесімді жұмысын көрсетті. Біздің команданың қарсыластары Әзербайжан, Беларусь, Қытай және Сербия командаларының қорытынды кездесулерінен кейін анықталады. Өз кезегінде қазақстандық жауынгерлер жартылай финалдық эстафетада өз шеберліктерін көрсетуі керек. Онда экипаждар кезекпен трассадан өтеді. Жартылай финалдық сайыстардың жеребе тарту рәсімі 30 тамызға белгіленген.
Финалға шығу үшін бақ сынайтын эстафеталық жарыс 1-2 қыркүйекке жоспарланған.
Айта кетейік, «Танк биатлоны» байқауы Ресей Федерациясы Мәскеу облысының «Алабино» полигонында Армия халықаралық ойындары-2020 аясында өтіп жатыр. Аталған байқау осы жылдың 5 қыркүйегінде аяқталады.
Санитарлық-эпидемиялық жағдай мен елде қабылданған шараларға байланысты Қазақстан биыл ең көрнекті және беделді саналатын «Танк биатлоны» байқауында ғана бақ сынайды. Байқауға 16 елдің танк экипаждары қатысады. Оның ішінде Абхазия, Әзербайжан, Беларусь, Вьетнам, Қазақстан, Қатар, Қытай, Конго, Қырғызстан, Лаос, Мьянма, Сербия, Тәжікстан, Өзбекстан, Оңтүстік Осетия елдері бар.
2019 жылы қазақстандық танкішілер үшінші орынды, 2018 жылы төртінші орынды иеленді.
