Қоғам • 01 Қыркүйек, 2020

800-ден астам ауылда интернет жоқ

32 рет көрсетілді

Қазақстандағы 4 646 елді мекен кең жолақты интернетке қосылған. Алайда 900-ге жуық ауылдық жерде ғаламтор желісіне деген тапшылық әлі де байқалуда. Бұл туралы Цифрлық даму, инновациялар және аэроғарыш өнеркәсібі министрлігі Телекоммуникациялар комитетінің төрағасы Виталий Ярошенко айтты. Ведомство жыл соңына дейін ауылда тұратын 99,3% пайыз халықты қажетті байланыс желісімен қамтуды көздемек.

ТОБЖ технологиясы қолданылады

Комитет төрағасының айтуынша, қазір кең жолақты интернетке 6 459 елді мекеннің ішінде 4 646-сы қосылған. Бұл ретте осы елді мекендерде 18,2 млн адам, яғни халықтың 97,3%-ы тұрады.

«Nur Otan партиясының сайлауалды тұғырнамасына сәйкес жыл соңына дейін 250 және одан да көп адам тұратын барлық ауылдық жерді интернетпен қамтамасыз ету міндеті қойылды. Қазір 883 ауылда интернет жоқ. Осы олқылықтың орнын толтыру үшін екі жоба жүзеге асырылуда. Біріншісіне келсек, Талшықты-оптикалық байланыс желісі (ТОБЖ) технологиясы негізінде аймақтарды кең жолақты интернетке қосу жоспарланып отыр», деді В.Ярошенко.

 

Мемлекеттік органдарға басымдық беріледі

Осы жобаның аясында мем­лекет ауылды елді ме­кен­­­­дердегі мектеп, ауруха­на және әкімдіктерге арнал­ған кең жолақты интернет қыз­метін сатып алмақ. Жыл­дың соңына дейін осы ар­қылы 1 257 ауылдағы 3 718 мем­­лекеттік органды қажетті ин­фра­құ­ры­лыммен қамту көзделген.

«Жылдың басында ұялы байланыс операторлары мен біздің министрлік арасында меморандумға қол қойылып, сол бойынша ұялы байланыс операторлары жобаны аяқ­тауға және 250-ден астам адам тұратын барлық ауылды 3G немесе 4G қызметтерімен қамтамасыз ету міндетін алды. Аталған жоба арқылы 46 ауыл қамтылып, қалған 882 елді ме­кенге интернет жылдың ая­ғына дейін жетуі тиіс», деді Теле­коммуникация комитетінің төр­ағасы.

 

Кең жолақты интернеттен таршылық көрмейді

Ведомство өкілінің сөзіне сенсек, екінші тоқсанның аяғы­на дейін халықтың 99,3%-ы кең жолақты интернеттен тар­шы­лық көрмейтін болады. Со­нымен қатар 250-ге жет­пей­тін ауылдық аймақ халқы­ның мәселесі де қарастырылып жа­тыр.

«Біздің ведомство Ұлттық экономика министрлігі және әкімдіктермен бірлесіп талдау жүргізді. Бүгінде 243 елді ме­кен іріктеліп алынды, онда кең жолақты интернет желісін қою жұмыстары пысықталуда. Жаңа оқу жылына тоқталсақ, біз арнайы жұмыс жүргіздік. Интернетке байланысты проблемасы бар мектептер мен ғалам­торға мүлдем қосылмаған ауылдар сабақты әдеттегі ре­жім­де жалғастырады», деді В.Яро­шенко.

 

9 мың шақырым желі салынды

«Қазақтелеком» АҚ бас­қар­ма төрағасы Қуанышбек Есе­кеев биыл елімізде 9 мың ша­қырымды құрайтын тал­шық­ты-оптикалық байланыс же­лісі салынғанын және оған 828 ауыл­ды қосу жоспарланып отыр­ғанын айтты.

«Биыл наурыз-сәуір айла­рында біздің байланыс орталы­ғының жүктемесі артты. Ин­тернет арқылы тәулігіне 2,5 мыңнан астам өтініш берілді. Абоненттердің негізгі бөлігі интернетке қосылады. Биыл шамамен 9 мың шақырымға жуық талшықты-оптикалық байланыс желісін салып, оған еліміздегі 828 ауылды қосу жоспарланып отыр. Онда шамамен 2 мың мемлекеттік мекеме, оның ішінде әкімдіктер, ауруханалар, мектептер ор­наласқан. Оптикалық тал­шық­­тың ке­луімен біздің мо­бильді байланыс желісі де ауылға келеді. Аудан ор­та­лықтарының, ауыл­дық елді ме­кендердің негізгі бөлігі ин­тернетке қосылған. Жыл со­ңына дейін барлық ауылдарды интернетке қосамыз», деді Қ.Есекеев.

Басқарма басшысының айтуынша, Tele2 және Kcell операторлары базалық стансаларды орнатуды бастады. Компания мамандары аймақтарды аралап, жаңа оқу жылында байланыс сапасын арттыру үшін қажетті жұмыстарға кіріскенін жеткізді.

Соңғы жаңалықтар

Тарихи жеңіске қол жеткізді

Теннис • Бүгін, 20:12

Нар тұлға

Руханият • Бүгін, 20:10

Екпе салдыру өзекті

Медицина • Бүгін, 20:07

Шетелдік басылымнан

Әлем • Бүгін, 20:02

Аруларымыз алты жүлде алды

Спорт • Бүгін, 19:55

Қазақстанға агробанк қажет пе?

Қазақстан • Бүгін, 19:51

Ұқсас жаңалықтар