Биылдың өзінде 32 білім беру нысанының ғимараты жаңадан тұрғызылмақ. Құрылысы қызып тұрған 32 нысанның қатарында 23 орта мектеп, 3 балабақша, 1 өнер мектебі, 1 спорт зал және 4 арнаулы білім беретін оқу орнының жатақханасы бар. Ал алдағы жылы 15 мектептің құрылысы аяқталмақ. Негізінен, биыл өңірдегі 55 мектепке 23,9 млрд теңгеге күрделі жөндеу жұмысы жүргізілген, яғни аудандардағы жаңғырған мектеп ғимаратының ашылуы жалғаса бермек.
– Осындай игі іс арқылы облыста үш ауысымды мектептердің саны азаймақ. Қазір 17 мектептің құрылысы аяқталуға жақын. Оның ішінде, жалпы сипаттағы трансферттер есебінен 11 мектеп, «Жұмыспен қамтудың жол картасы-2020» бағдарламасы бойынша 6 мектептің құрылысы жүргізілуде. Бұдан басқа, жол картасы бойынша 1500 орындық тағы 6 мектеп және құны 29,9 млрд теңге болатын 1200 орындық 1 мектеп салу көзделген, – дейді облыстық білім басқармасының басшысы Майгүл Омарова.
Қазір бірнеше ауданда құрылысы аяқталған мектептер пайдалануға берілді. Атап айтқанда, Қарасай ауданының Әйтей ауылындағы Б.Қосынов атындағы орта мектеп ғимараты толықтай қайта салынып, іске қосылды. 1200 орынға лайықталған бұл мектеп Алматы облысындағы мемлекет-жекеменшік әріптестігі аясында жүзеге асқан алғашқы білім беру нысаны. Сондай-ақ Көксу ауданының Қызылтоған ауылындағы шыт жаңа мектеп те жаңа оқу жылына есігін ашты. Жақында сән-салтанаты жарасқан 2 қабатты, 120 орындық білім ордасының ашылу рәсіміне аудан әкімі Алмас Әділ қатысты. Мектеп қазақ тiлiнде бiлiм беруге арналған. Бұл жобаның жүзеге асуы үшiн облыстық бюджеттен 717 млн теңге қаражат бөлiндi. Ендi жас қызылтоғандықтар жаңа ғимаратта, ашық та ыңғайлы сынып бөлмелерiнде өз бiлiмдерiн жетiлдiретiн болады. Пандемия жағдайына байланысты 1-4 кезекші сыныптардағы 40 оқушы барлық санитарлық талаптарды сақтай отырып, мектеп қабырғасында білім алуды бастаса, 62 оқушы қашықтықтан оқуда.
Жақында Жамбыл ауданына қарасты Жайсаң ауылында да үш қабатты мектеп ғимараты қолданысқа берілді. Бұған дейін орын тапшылығына байланысты үш ауысымда білім беретін 5 білім ошағының бірі болған Жайсаң орта мектебі енді бұл қиындықты артқа қалдырды. 300 орынды ғимаратта жоғары сыныптарға арналған 20 пән кабинеті бар. Зертханалары толық жабдықталған. Заманауи техникалық құралдармен толықтырылған. 20 интерактивті тақта, 130 компьютер, мәжіліс залы жұмыс істейді. Оқушылардың дене шынықтыруына, бос уақыттарын тиімді пайдалануына қолайлы кең спорт залы да тартымды әрі жайлы және мектеп ауласында спорттық ойындарға арналған екі алаң салынған.
Жалпы, биыл Алматы облысындағы білім саласына бөлінген қаржы 314,2 млрд теңгені құрап, 2019 жылмен салыстырғанда 108 млрд теңгеге артып отыр. Бұл әлеуметтік салаға бөлінген бюджет қаражатының 65 пайызы білім саласына бағытталғанын білдіреді. Ал оқу жылында 426 мыңнан астам бала оқуға кірісті. Оның ішінде 48 мың оқушы 1-сыныпқа қабылданған.
– Санитарлық-эпидемиялық жағдайға байланысты облыста жаңа оқу жылы қашықтан басталды. Бастауыш сынып оқушылары ата-аналардың өтініші негізінде кезекші сыныптарға жіберілді. Шалғайдағы елді мекендердегі шағын жинақталған 145 мектепте санитарлық талаптарға сәйкес 15 баладан екі ауысымда штаттық режімде оқиды. Штаттық режімде білім беретін мектептерде қатаң санитарлық талаптар сақталады. Бұл үшін барлық қажетті жағдайлар жасалуда. Қабылданған шаралар нәтижесінде жаңа оқу жылында облыс оқушыларын компьютермен қамтамасыз ету мәселесі толық шешілуде, – дейді облыс әкімінің орынбасары Рустам Әли.
Алматы облысы
