Ойынның 53-минутында Максим Бордачев әріптесі Игорь Стасевичтің айып алаңына асырған добын ұтымды пайдаланып, есеп ашты. Қазақстан құрамасы көп ұзамай таразы басын теңестірді. Ян Вороговскийдің шірене тартқан добын қақпашы Александр Гутор уысынан шығарып алған еді. Өзгелерден оқ бойы озық шыққан Абат Айымбетов қақпашының қателігін сәтті пайдаланды – 1:1.
Егер сол қапталдағы қорғаушымыз Ғафуржан Сүйімбаев өрескел қателік жібермегенде ойын тең аяқталар ма еді, кім білсін. Сүйімбаев 86-минутта Беларусь футболшыларына «сыйлық» жасады. Айып добын қосу кезінде қателескен Сүйімбаевтың «сыйын» Виталий Лисакович голға айналдырып, есепті 2:1-ге жеткізді.
Қазақстан үшін Беларусь құрамасы алынбас қамалға айналды. Бұған дейін екі құрама үш рет жасыл алаңға шығып, Беларусь аяқдопшылары екеуінде жеңіске жеткен (4:0, 5:1). Тек бір ойында жеңімпаз анықталмады (1:1).
