7 қыркүйекте Петропавл полициясына қала тұрғыны оның М. Әуезов көшесіндегі үйінің подъезінен құны 45 мың теңге тұратын “Stern Vega” маркалы велосипеді ұрланғаны туралы жүгінген. Жедел-іздестіру іс-шарасы барысында Петропавл қ. ПБ Екінші полиция бөлімінің қызметкерлері бұрын мүліктік қылмыстар жасағаны үшін бірнеше рет қылмыстық жауапқа тартылған облыс орталығының 31 жастағы тұрғынын, күдіктіні анықтады. Оның екі күн бұрын жасалған пәтер ұрлығына қатысы бар екені анықталды. Сол күні күндіз Береке ықшам ауданындағы пәтердің кіреберісінен ұялы телефон ұрланған. Абырой болғанда, үйдің подъезі бейнебақылаумен жабдықталған екен, соның көмегімен күдіктінің жеке басын анықтау мүмкін болды. 8 қыркүйекте ол ұсталды. Аталған фактілер ҚР Қылмыстық кодексінің (Ұрлық) 188-бабы 3-бөлігі бойынша Сотқа дейінгі тергеп-тексерулердің бірыңғай тізіліміне енгізілді. Қазіргі уақытта қамаққа алу түріндегі бұлтартпау шарасын таңдау туралы мәселе шешілуде. Ұрланған мүлікті іздеу бойынша шара қабылдануда. Барлық материалдарды Екінші ПБ қызметкерлері темір жол вокзалы аумағынан мыс сымдарды ұрлағаны үшін күдіктіні іздеген Петропавл қ. Желілік полиция бөліміне тапсырады.
"Екі жағдайда қаскөйлер қараусыз мүлікті олжалаған. Велосипед, балалар қол арбасы, самокаттар есігі құлыпталмайтын, домофоны жоқ подъезде тұрған. Құны 50 мың теңге тұратын “Redmi Xiaomi” телефоны ұрланған пәтердің есігі құлыпталмаған болып шықты. Иелері үйлерінде болған, бірақ қылмыскердің қалай кіріп, көзіне түскен затын ұрлағанын байқамаған. Подъезде домофон орнатылған, алайда қылмыскерлер көп жағдайда адамдардың көңіл бөлмеулерін пайдаланады. Олар есікті біреу ашқанда өтіп кетеді, кейде кездейсоқ таңдалған пәтерге қоңырау шалып, сол үйдегі пәтерлердің біріне келдім деп немесе өздерін коммуналдық қызметтердің қызметкерлеріміз деп таныстырулары мүмкін. Тұрғындардың өздері домофонды “ыңғайлы болу үшін” өшіріп тастайтын жағдайлар бар. Қорғаныс құралдары пайдаланылмайтын, бейтаныс адамдарға назар аудармайтын жерлерде осындай жағдайлар орын алуы мүмкін", – дейді Екінші полиция бөлімінің бастығы Руслан Сыздықов.
Полицейлер ұрлықтың алдын алудың ең тиімді тәсілі – сақтық шараларын күшейту екендігін айта кетті. Барлығы жыл басынан Петропавлда 249 пәтер ұрлығы тіркеліп, оның 233-і өндіріспен аяқталды.
