Алматыда оқушыларға 15 мың ноутбук қай уақытқа дейін беріледі?

Білім • 11 Қыркүйек, 2020

Алматыда оқушыларға 15 мың ноутбук қай уақытқа дейін беріледі?

20 рет көрсетілді

Өңірлік коммуникациялар қызметі алаңында білім беру мекемелеріндегі ахуалдан хабардар еткен Алматы қаласы Білім Басқармасы басшысының орынбасары Қайрат Жұманов оқу барысын ұйымдастыру мәселесіне тоқталды, деп жазады Egemen.kz

Эльвира СЕРІКҚЫЗЫ

Алғашқы он күндегі оқу барысын жүйелі де жоспарлы басталды деген Қ.Жұманов қалада 270 мыңнан астам баланы қамтитын 207 мемлекеттік, ал 16 мыңнан атсам бала оқитын 63 жекеменшік мектеп бар, деп атап өтті. Қыркүйекте бірінші сыныпқа барғандар саны – 27 809. Оқушылар эпидемиялық жағдайға байланысты 205 мектепте қашықтықтан білім алуда. Сонымен қатар штаттық кестеге орай білім алып жатқан мектептер жұмысына тоқталған Қ.Жұманов қазіргі кезде қаладағы 102 мектепте 1-2-сыныптар үшін кезекші сыныптар ашылғандығын жеткізді. Онда он бес оқушыдан аспайтын жағдайда 3353 баланы қамтитын 256 кезекші топ ұйымдастырылған. Бұл топтарда 256 мұғалім сабақ беруде. Ал мектептерде пән мұғалімдерінің жетіспеушілігі жоқ.

Қ.Жұманов сонымен қатар жаңа оқу жылына орай 50 мыңнан астам оқушы мен мұғалімдерге компьютерлік техника берілгендігін жеткізді. Компьютер жоқ отбасылардағы балаларды қажетті техникалармен қамтамасыз етуде балаларға табыс етілген ноутбуктардың қайдан келгенін, кімдер сыйлағанын назарға алған Қ.Жұманов осы игі іске атсалысқан ұйымдар жайында мәлімет беріп өтті. Тарата айтар болсақ, жан басына қаржыландыру бойынша мектептер 9 120 ноутбук сатып алса, жергілікті бюджет есебінен 22 212 планшет, 11 042 компьютер сатып алынып, оның 2 мыңы берілген. Ал қалған 9 мыңы 15 қыркүйекке дейін жеткізілетін болады. Ал 38 591 компьютерлік техника Үкіметтің резервтік қоры есебінен алынып, оның 18 388-і жеткізілген. Қалған 5 203 планшет пен 15 000 ноутбук 15 қыркүйекке дейін жеткізілетін болады.

Қ.Жұманов демеушілік көмек есебінен де үлкен көмек көрсетілгенін атап өтті. 150 ноутбукты еліміздің Сыртқы істер министрлігі, "Қазақстандық дипломаттар бірлестігі" және Бала құқықтары жөніндегі уәкілі Аружан Саин әлеуметтік осал топтағы отбасылардың балаларына берсе, "Салиқалы ұрпақ" қоғамдық қорының демеушілері 500 ноутбук, "Мектепке жол" акциясы аясында Nur Otan қалалық филиалы әлеуметтік аз қамтылған отбасыларға 1,5 мың планшет пен 1000 мектеп құралдарын сыйға тартқан.