Аталған деректі фильмдер топтамасы түрік және ағылшын тіліне аударылып, шетелдік телеарналарда көрсетілмек.
Ұлттық өнерді насихаттаушы – жыршы, күйші, бүркіт, тазы баптаушы, домбыра, ер жасайтын ұста және басқа да кейіпкерлер туралы сыр шертетін туынды өңірдің оң имиджін қалыптастыру мақсатында өткізілген баспасөз мәслихаты барысында таныстырылды. Деректі фильмдердің кейіпкерлері келестік жыршы, термеші Абылай Бөріханов пен отырарлық суретші Әділхан Мәлік халқымыздың сан ғасырлар бoйы атадан балаға мирас болып жеткен рухани және мәдени құндылықтар туралы сөз өрбітті. Жобаның режиссері Мейіржан Алиакбаровтың мәлімдеуінше, қазақ музыкасын, мәдениетін, салт-дәстүрін насихаттауға бағытталған дүниелердің бірі, яғни ұлы композитор Шәмші Қалдаяқовтың 90 жылдық мерейтойына арналып, Венгрия, Башқұртстан, Германия, Бурятия, Қырғызстан, Украина, Ресей, Армения, Болгария, Қазақстан елдері өнер шеберлерінің орындауындағы «Қуаныш вальсі» әніне түсірілген бейнебаян әлеуметтік желідегі ең көп таралған челлендж клип болған.
Жиында, сондай-ақ, Елбасының «Болашаққа бағдар: рухани жаңғыру» мақаласындағы «Туған жер» бағдарламасына бағытталған өңірдің табиғаты тамаша мекендері мен киелі орындарға саяхатқа шақыратын «Туған ел» әніне түсірілген клиптің тұсауы кесілді.
Түркістан облысы
