Турнирдің бірінші айналымында әлемдік рейтингте 66-орында тұрған қазақстандық Зарина Диас рейтингте 90-сатыға жайғасқан америкалық Кристина Макхэйлмен ойнайды. Екі теннисші бүгінге дейін үш мәрте бақ сынап, екеуінде Макхэйл, бір матчта Диас жеңіске жеткен. Егер осы бәсекеде отандасымыз жеңіске жетер болса, жеке кездесу бойынша есеп теңеседі.
Ал еліміздің бірінші, әлемнің 18-ракеткасы Елена Рыбакина бельгиялық Гретье Минненмен (106) кездеседі. Екі теннисшінің жолы осымен екінші рет түйісіп отыр. Бұған дейін Рыбакина мен Миннен жыл басында Аустралия ашық чемпионатында кездескен. Екі сетке созылған бәсекеде отандасымыз 6:3, 6:4 есебімен басым түскен еді. Айта кетелік, жарысқа жалпы есебі 32 спортшы қатысуда.
