Спорт • 23 Қыркүйек, 2020

«Тур де Франсты» тәуір қорытындылады

126 рет
көрсетілді
5 мин
оқу үшін

Биыл 107 мәрте ұйымдастырылған велоспорттан «Тур де Франс» велокөпкүндігі Екінші дүниежүзілік соғыстан кейін тарихта алғаш рет өз уақытында өтпей қалды. Дәстүр бойынша Франция тас жолында өтетін дүбірлі бәсеке жыл сайын шілде айында басталатын. Алайда әлемдік пандемияға байланысты ұйымдастырушылар осы жылғы жарысты әдеттегідей шілде айында емес, қыркүйекте өткізуге мәжбүр болды. Сондай-ақ «Тур де Франстың» алғашқы кезеңдері Францияның көршілес елдерінен басталып, соңғы кезеңі Париждегі Елисей алабында аяқталатын. Ал биыл 21 кезеңнің жарыстары тек Франция аумағында өтті.

«Тур де Франсты» тәуір қорытындылады

Бас-аяғы 23 күнге созылған велошабандоздар арасындағы ең белді жарыстың қорытындысы бойынша, жалпы есепте 22 жас­тағы словениялық Тадей По­гачар (UAE Team Emirates) топ жарды. Сонымен қатар сло­вениялық жас талант таулы кезеңнің үздігі және «Тур де Франс» жарысының ең жас велошабандозы атағын қоса жеңіп алды. Осындай жетістігінің арқасында ол «Тур де Франстың» біраз рекордына түзету енгізді.

Мәселен, Тадей Погачар «Тур де Франста» топ жарған Сло­вениядан шыққан тұңғыш велоспортшы атанды. Сонымен қатар ол турнир тарихында жеңімпаз атанған ең жас велошабандоз (21 жас, 11 ай және 29 күн) болды.

Бұдан бөлек Погачар «Тур де Франстың» кейінгі 86 жылдағы таулы кезеңнің үздігі атанған ең жас спортшы атағын иеленді. Жә­не де веложарыс тарихында ал­ғаш қатысқан жылы жеңіс тұғы­рына көтерілген 12-ші спортшы.

21 жастағы словениялық велошабандоз 9 кезең бойы жалпы есепте үздік үштіктен түскен жоқ. Ал 20-кезеңге дейін екінші орында келген Погачар соңғы кезеңде сары жейденің иегері атанды. Погачар – «Тур де Франс» тарихында жекелей жарыс кезеңінен кейін сары жейде киген бесінші велошабандоз.

Велоспортшылардың бейрес­ми әлем чемпионаты саналатын «Тур де Франс» жарысына қазақстандық «Астана» ве­локомандасы да қатысып, тәуір нәтиже көрсетті деп се­нім­мен айта аламыз. Себебі ел чемпио­ны Алексей Луценко мен команда капитаны Мигель Анхель Лопес тиісінше 6-шы және 17-кезеңдерде топ жарды. Ал жарыс қорытындысы бойынша ко­лумбиялық велошабандоз жалпы есепте алтыншы орын­нан көрінді. Сәйкесінше, «Ас­тана» өкілдері арасындағы ең үздік нәтиже де Лопеске тиесілі. Жалпыкомандалық есепте біздің команда 22 ұжымның арасында жетінші орынды иеленді.

– «Тур де Франс» жарысы­на тұң­ғыш рет қатыссам да мен үшін жоғары деңгейде өтті. Осын­дай ірі жарыста бақ сынап, Па­рижге дейін жеткенімнің өзі үлкен жеңіс. Маған бұл жарыс өте ұна­­ды, жоғары деңгейде өнер көр­сетіп, әр кезең сайын ең мықты қар­сыластардың қасында болдым. Сонымен қатар таулы кезеңнің жеңімпазы атандым. Соңғы жарыс жолына дейін үздіктер қата­рын­да келіп, жүлдеге қол созым сәтте маған уақыт жетпей қалды. Алайда мен өзіме құнды тәжірибе жинадым және келесі жылы бұдан да күшті болып оралатыныма сенімдімін. Осы үш апта ішінде барлық команда өкілдеріне, ша­бандоздарға, қызметкерлерге, менеджментке алғыс айтқым келеді!», деді Мигель Анхел Лопес.

Ал қазақстандық велокоман­даның бас менеджері, еліміздің даңқты велошабандозы Алек­сандр Винокуров «Астана» команда ретінде жақсы нәтиже көрсетіп, «Тур де Франсты» та­бысты өткізді деп санайды. «Қа­зақстан чемпионы Алексей Лу­ценко мен біздің көшбасшымыз Мигель Анхель Лопес өте тартыс­ты болған екі кезеңде жеңіске жетті. Біз жақсы командалық жұ­­мыс үлгісін көрсетіп, үш апта бо­йы бір мақсат үшін команда бо­лып көп жұмыс істедік. Біз бірге жеңіп, бірге жеңілдік, бірақ бұл біздің спорттың бір бө­лігі екенін ұмытпауымыз қажет. Десе де команда көрсеткен нәти­жеге көңіліміз әбден толады. Жал­пы есепте алтыншы орынды олжа­ладық, екі таулы кезеңде үздік атан­дық және Мигель Анхель Лопес пен Харольд Техаданың сәтті дебютінің куәгері болдық. Мау­сым әлі жалғасады және бізді алда жаңа жарыстар мен жаңа белес­тер күтіп тұр», деді жарыс­ты қорытындылаған Александр Винокуров.