Нидерланды Корольдігіндегі Гаага қаласында Қазақстан Республикасының осы елдегі елшісі М.Мырзамедиева ЕҚЫҰ-ның Ұлттық азшылықтар істері жөніндегі жаңа Жоғарғы комиссары А.Торс бастаған кеңсе өкілдерімен кездесті, деп хабарлады ҚР СІМ-інің баспасөз қызметі.
Нидерланды Корольдігіндегі Гаага қаласында Қазақстан Республикасының осы елдегі елшісі М.Мырзамедиева ЕҚЫҰ-ның Ұлттық азшылықтар істері жөніндегі жаңа Жоғарғы комиссары А.Торс бастаған кеңсе өкілдерімен кездесті, деп хабарлады ҚР СІМ-інің баспасөз қызметі.
Кездесу барысында қазақстандық дипломат сұхбаттастарын Қазақстан қоғамының қазіргі даму кезеңі, ел басшылығының ішкі саяси тұрақтылықты қамтамасыз ету, Қазақстанның көпұлтты және көпконфессиялы халқын топтастыру бойынша белгілеген ұзақ мерзімді басымдықтары туралы егжей-тегжейлі әңгімелеп берді. 2011-2014 жылдарға арналған Ұлттық бірлік доктринасының басты қағидаттары да жан-жақты түсіндірілді.
Кездесу кезінде тараптар Қазақстандағы конфессияаралық және этносаралық келісім саласындағы соңғы жетістіктер туралы ақпараттармен алмасты. Кеңсе өкілдерін Қазақстанда өткен Әлемдік және дәстүрлі діндер көшбасшыларының кезекті съезі, Қазақстан халқы Ассамблеясының 20 сессиясы сияқты шаралар қызықтырды. Кездесу аясында А.Торстың Астанаға ықтимал сапары талқыланды.
ЕҚЫҰ кеңсесінің өкілдері этносаралық және конфессияаралық келісімнің қазақстандық үлгісін жоғары бағалап, Қазақстан халқы Ассамблеясы институтының ел халқын топтастырудағы тамаша рөлін атап көрсетті. Кездесу қорытындысы бойынша тараптар ұлтаралық және конфессияаралық келісімді ЕҚЫҰ кеңістігінде нығайта беру үшін өзара іс-қимылды одан әрі жалғастыру қажет деген ортақ ұстанымға келді.