Осы орайда жер астындағы кәріз жүйелерін ауыстыру мен жаңғыртудың мұндай ескі тәсілінен бас тартып оның әлемдік стандарттарға сай жаңа заманауи тетіктерін тәжірибеге енгізген ақсайлық маман-жұмысшылардың бастамасы бәрекелді деуге әбден лайықты. Жаңа тәсілдің басты өзгешелігі мен артықшылығы жоғарыда айтылғандай жағымсыз жәйттердің бір де бірі болмайды. Нақтырақ айтқанда жұмыс үдерісі кезінде жер үсті астан-кестен болып қопарылмайды. Әрі су жүйелері айырылмайды.
- Бұл салалық термин тілінде сонация тәсілі деп аталады. Оны Ақсай қаласындағы кәріз жүйелерін жаңғырту кезінде тұсаукесер жоба ретінде тұңғыш рет қолданған едік. Оны пайдалану арқылы Халықтар достығы көшесінен Сырым Датов және теміржол көшесіне дейін 1769 метр құрайтын жер асты кәріз жүйелері күрделі жөндеулерден өткізілуде. Қазір құбыр ауыстыру жұмыстары мәреге таяп келеді. Жобаның жалпы құны 553 миллион теңге құрайды, дейді тың тәсіл жөнінде Бөрлі ауданының әкімі Миржан Сатқанов.
