Парламент Сенаты Төрағасының орынбасары Асқар Бейсенбаев Астанаға келген Атырау облысының ардагерлерімен кездесті, деп хабарлады осы палатаның баспасөз қызметі.
Парламент Сенаты Төрағасының орынбасары Асқар Бейсенбаев Астанаға келген Атырау облысының ардагерлерімен кездесті, деп хабарлады осы палатаның баспасөз қызметі.
Кездесуде ұзақ жылдар мұнайлы өлкенің экономикасын дамыту мен халықтың әлеуметтік жағдайын жақсартуға аянбай атсалысып, ауыл шаруашылығы, денсаулық сақтау, заң, білім беру, теміржол салаларында, сондай-ақ бұрын әр кезеңде басшылық лауазымдарда қызмет атқарған еңбек ардагерлері бүгінгі еліміз қол жеткізіп отырған жетістіктерге ризашылығын білдіріп, ел дамуындағы Елбасының жетекші рөлін ерекше атап өтті.
Сенат Төрағасының орынбасары кездесуде «Қазақстан-2050» Стратегиясында Мемлекет басшысы алға қойған міндеттерді жүзеге асыруда Парламентте атқарылып жатқан жұмыстар туралы жан-жақты әңгімеледі. Сондай-ақ, басқосуда әлеуметтік-экономикалық жаңғырту және индустриялық-инновациялық даму бағдарламасын заңнамалық тұрғыда қамтамасыз етудегі депутаттық корпустың қызметі туралы айтылды.
Сонымен бірге, А.Бейсенбаев кездесуге келген ардагерлер арасындағы 94 жастағы соғыс ардагеріне ұзақ ғұмыр тіледі және «Үлкенге – құрмет, кішіге – ізет көрсету – біздің еліміздегі қастерлі дәстүрлердің бірі. Осы Жеңіске жеткізген Ұлы Отан соғысының ардагерлеріне шексіз алғыс айтамыз. Біздің ардагерлердің жанқиярлық ерлігі мен еңбегінің арқасында бейбіт өмір кешіп жатырмыз. Тәуелсіздік алған жылдардан бері мемлекет тарапынан ардагерлердің әлеуметтік және тұрмыстық жағдайын жақсарту үшін барлық мүмкіндіктер жасалып келеді. Бұл маңызды іс бұдан былай да жалғаса беретін болады», деді.
