Аймақтар • 29 Қыркүйек, 2020

Қарттарға қамқорлық қажет

61 рет көрсетілді

Жаман індеттің зардабы Қарттар күнін де қалыпты жағдайда өткізуге кедергі келтіріп отыр. Жыл сайын «Қарттар күнінің» қарсаңында Солтүстік Қазақстан облысының мекемелері мен кәсіпорындарының қызметкерлері сенбілікке шығып, оның ақшасын облыстық, қалалық, аудандық ардагерлер ұйымда­рының есепшоттарына аударатын еді. Осынау біркүндік табыстың өзі қарттарды құттықтап, естелік сыйлықтар, азды-көпті ақша мен зейнетақысына ала бермейтін пакеттер толы тәтті-дәмділерді таратып, дастарқан жайып, жақсы мерекелеуге, құрмет көрсетуге мүмкіндік беретін.

Мәселен, былтыр «Арда­герлерімізге жүрек жылуы­мызды білдірейік» деген сен­біліктен басқа да акция өт­кізіліп, облыста қарттар үшін бір қуанышты күндер болып еді. Оның шеңберінде 42 қарттың үйі жөнделді, 16 568 аз қамтылған, жасы кел­­ген адамдар азық-тү­лік пакет­терін алды. Со­ны­мен бірге 47 222 қартқа түр­лі ма­териал­дық көмек көр­сетілді. 11 684 адам тегін дәрі-дәрмектер алды. Ал 203 зейнеткер са­наторий-ку­рорттық емдеу орында­ры­на жіберілді. Соның ішінде қарттарды ма­те­риал­­дық жа­ғынан қол­дауда Пе­тропавл қаласы мен Та­йын­ша және Қызылжар аудандары көзге түскен.

Өкінішке қарай, биылғы жаман індеттің кесірінен мұндай көмектер жасалмайды, өйткені сенбілік өтпейді, қайырымдылық акциялары жүргізілмейді. Бірақ жү­регі дүрсілдеп, осы күнді асы­ға тосып, алаңдап оты­ра­тын қамкөңілді қарттарды құт­тық­тамауға бола ма? 

Облыстық ардагерлер кеңесінің төрағасы Ескендір Елеусізов ағамызға жолығып, би­ылғы қарттар мерекесінің қалай аталып өте­тінін сұра­ғанымызда біршама жаңа­лыққа қанықтық.

«Біз жергілікті би­лікке, ме­кемелер мен кәсіпорындар басшыларына хат жазып, «Қарттар күнін» атап өту­ге шақырып отыр­мыз. Арда­герлер аспаннан түскен жоқ, бә­рі де осы елдің, осы жердің тумалары. Өмір бақи осы жердің өркендеуіне қызмет етті, халық са­нын арттырып, саналы ұр­пақ өсір­ді. Ертеңгі күні бә­ріңіз де қарт боласыздар, сонда бүгінгі жасаған құр­мет­теріңіз өзде­ріңіздің алды­ңыздан шығады деп жатырмыз. Ақшалай көмек бере алмасаңыздар тым бол­маса көңіл білдіріп, ме­дициналық қыз­метпен, жылы сөзбен құттықтаңыздар деген ті­лектер айттық. Обалы не­шік, бәрі де тү­сіністікпен қарап, өз аумақтарындағы қарт­­тарын құттықтауға уәде беріп жатыр», деді Ескендір ағамыз.

Жуырда ардагерлер ұйы­мының бастамасы бойынша облыс әкімінің орынбасары Ғани Нығыметовтің жүр­гізуімен барлық аудан әкімдерінің орынбасар­лары, ардагерлер ұйым­дарының төрағалары қатыс­қан селекторлық кеңес өт­ті. Жиында бар­лық ауданда Қарттар күніне ар­налған айлықты тиімді өт­кізу мәселесі қаралды. Со­ның ішінде медицина қызметкерлері қарттардың үйлеріне барып, олардың ден­саулықтарын тексеріп шы­ғуы тапсырылып, қам­­көңілді жандарды риза ету сұралды. Осы хат­тамалық тапсырма об­лыс­тық ден­саулық сақ­тау бас­қарма­сына берілді. Со­­нымен бірге жастар ұйым­­дарының бар­лық сатыларына да өз аймақ­тарындағы қарт­тарды құттықтап шығуға ұсыныс жасалады.

Ауыл шаруашылығы бас­қармасы мен жергілікті әкімдіктерге ауылдағы малы бар қарттардың үйіне бір тіркеме шөп тү­сіру, қыстық отынын жеткізіп беру, 1-2 қап жем, бірер қап ұн беруді ұйымдастыру тапсырылады. Сонымен бірге аудан орта­лықтарында ауыл ша­руашылығы өнімдерін сататын жәрмеңкелер қарттар күніне арналып, тағамдар сәл жеңілдетілген бағамен сатылса да қарттарға жа­салған құрмет болмақ.

Биыл фермер, шаруа­лардың жағдайы жақсы. Астық тым шығымды бол­мағанымен сапасы жоғары, бағасы үлкен. Сондықтан қарт­тарын қадірлеуді, олар­дың көңілін аулауды еш­кімнің ұмытпағаны жөн. Өз ауылдарынан шыққан құрметті ақсақалға 10-15 күндік демалыс орнына жолдама апарып берсе, ондай шаруаға қарттар әбден разы болып қалар еді. Қарттар күнін атаудағы негізгі мақ­сат – қарт адамдардың көңілін көтеру.

Осындайда Президент Қасым-Жомарт Тоқаевтың жаман індет әлеуметтік және экономикалық қиындықтар тудырып жат­қан кезде хал­қымыз тұтастық пен бір­лікті нығайта түсуі керектігін айт­қан сөздері ой­ға оралады. Халықтың барлық санаты бір-бірін қолдап, бірлік пен тұтастық ны­ғая түссе – қиындықты еңсеруде оңай болары сөзсіз.

 

Солтүстік Қазақстан облысы

 

Соңғы жаңалықтар

Жоғалған бала 12 сағатта табылды

Аймақтар • Бүгін, 14:38

Крипто ақшаның жаңа дәуірі

Экономика • Бүгін, 10:29

Тыңғылықты дайындық бар

Қоғам • Бүгін, 08:26

Тұтынушыларға тікелей сата алады

Экономика • Бүгін, 08:17

Аймақта діни ахуал тұрақты

Аймақтар • Бүгін, 07:33

Сүйем сені, беу өмір!..

Руханият • Бүгін, 07:25

Құдықсай ауылы көмір тасып алды

Аймақтар • Бүгін, 07:24

Көпбалалы ананың кір сабыны

Экономика • Бүгін, 07:23

Ұқсас жаңалықтар