Аймақтар • 29 Қыркүйек, 2020

Ескі компьютерлер жаңартылады

377 рет
көрсетілді
3 мин
оқу үшін

Жыл басында облыстық білім басқармасының басшысы аймақ мектептері әлі де 13,5 мың компьютерге мұқтаж екенін айтқан. Содан бері облыста бұл мақсатқа «Цифрлы Қазақстан» мемлекеттік бағдарламасы аясында 1390,2 млн теңге бөлініп, оқу ошақтарын қажет мүлікпен толық қамту шаралары жүзеге асырыла бастады.

Ескі компьютерлер жаңартылады

Осыдан екі апта бұрын Қостанайға қашықтан оқып жатқан оқушыларға арналған 1,5 мың компьютер әкелініп, облыстың бірнеше аудан, қала­лар­ындағы білім мекемелеріне жеткізілген. Бастысы, қашық­тан білім алып жатқан оқу­шы­лар қажет құралдан қы­сы­лып қалмауы керек. Ал өткен аптаның аяғында білім басқармасының мамандары компьютер, ноутбук, план­шеті бар – 651 техникалық құрылғыны Арқалыққа жібер­ді. Жүк көлікке тиелер алдында басқарма өкілдері мен қоғам белсенділері әр құрылғыны мұқият тексеріп шықты.

– Бүгін 1,5 мың компьютер құралын тексеріп, қабылдап алдық. Мониторинг барысында әр компьютердің ақауының бар-жоғы тексеріліп, қосымша бөлшектерінің түгел екеніне көз жеткіздік, – деді «Қостанай – адалдық алаңы» жобалық офисінің менеджері Еркебұлан Тіленбаев.

Қалған компьютерлер мони­­то­рингтік топ мүшеле­рінің қатысуымен Денисов, Қамысты, Қарасу, Меңдіқара, Ұзынкөл аудандарына жөнел­тіледі. Білім басқармасы бас­шысының айтуынша, биыл облыс мектептеріне жалпы саны 15 мың компьютер жеткізілуі тиіс.

– Қашықтан оқып жатқан оқушыларға арналған 1,5 мың құрылғы аталған аудандардағы білім мекемелеріне келісімшарт бо­йынша 4 қазанға дейін жеткізілуі керек. Қалған 13 638 компьютер құралын қазан айында таратып береміз. Яғни, алдағы айда облыстың барлық 20 өңіріне 11 мың ноутбук, 2 мың планшет жөнелтіледі, – деді білім басқармасының басшысы Зәуре Байменова.

Бұл компьютерлер әр аудан­ға сол жердегі оқушы­лардың және ауыстыру­ды қажет ететін ескі компью­тер­лердің санына қарай үлес­ті­рі­ле­ді. Басқарма басшысының сөзінше, жыл басынан бері облыс мектептері оқушыларға 12 мың компьютер ұстатқан. Қашықтан оқыту аяқталған соң оның бәрі мектеп меншігіне қайтарылады. Бұл мақсатқа Үкімет қорынан 2,4 млрд теңге жұмсалып отыр.

– Өңір мектептерінде мұқ­таж оқушыларға компьютер тарату жұмыстары әлі де жалғасып жатыр. Құралы жоқ балалардың ата-аналары мектепке хабарласып, уақытша пайдаланатын компьютер алуына болады. Әлі де кеш емес. Алайда бүгінде облыстағы 493 мектептің 355-і штаттық режімде жұмыс істеп жатқанын атап өту керек. Сондықтан мектепке де компьютер қажет, –деді басқарма басшысы.

Мониторинг тобы тексерген жаңа компьютерлердің біразынан ақау табылып, қа­был­даудан өтпей қалды. Осылайша жеткізуші компа­нияның бірден 20 мониторды қайта ауыстырып беруіне тура келді.

 

Қостанай облысы