Бауыржан Байбек өңір жұртшылығымен "Nur Otan» партиясының қалалық сайлауалды бағдарламасындағы негізгі басымдықтарды талқылады.
"Баршаңызға мәлім, биыл дана Абайдың туғанына 175 жыл толып отыр. Ұлы ойшылдың мерейтойын лайықты атап өту мақсатында ел Президенті Қасым-Жомарт Тоқаев арнайы Жарлық шығарып, оны қоғамдық сананы жаңғыртатын елдік іс-шара ретінде өткізуді, Алаш қайраткерлері ту тіккен Семей қаласын тарихи орталық ретінде белгілеуді тапсырды. Қашанда елдігін баянды, мемлекеттілігін мәңгілік етуді көздейтін ұлттар тарихына бойлап, тұғырлы тұлғаларының асыл ойларын ел дамуының өзегіне айналдырады. Елбасы Нұрсұлтан Назарбаевтың қолға алған істерінің түпкі түйіні де, "Рухани жаңғыру" бағдарламасы мен "Ұлы Даланың жеті қыры" мақаласы да осынау ұлы мұраттарды көздейді", деп жазды Б.Байбек Facebook парақшасында.
Бұдан соң, ол әлемді шарпыған індетке қарамастан, ақын мерейтойын атап өтуге байланысты елімізде біршама ауқымды жұмыстар атқарылғанын жазған.
"Мемлекет басшысының тапсырмалары аясында хакім Абайдың туған жерінде істеліп жатқан жұмыстарды қадағалау мақсатымен бүгін Семей қаласына арнайы келдім", - делінген партия Төрағасының бірінші орынбасарының жазбасында.
Бауыржан Байбек Шығыс Қазақстан облысының әкімі Даниал Ахметовпен бірге шаһардағы қайта жөндеуден өткізілген Абай алаңында, Абай атындағы театрда болып, ары қарай Жидебайға аттанған. Ұлы ойшылдың рухына тағзым етіп, ақын ұрпақтарымен, ел ағаларымен кездесті.
"Ел жайы, руханият мәселесі әңгіме арқауына айналып, белгілі қаламгер Төлеген Жанғалиев ақсақал Елбасы, Нұрсұлтан Назарбаевтың да ел Президенті ретіндегі алғашқы қадамын Абай елінен бастағанын, осы жолды бүгінде Мемлекет басшысы Қасым-Жомарт Тоқаев та жалғастырғанын есіне алды.
Жалпы, Абайдың 175 жылдығын атап өту аясында үлкенді-кішілі 500-ге жуық іс-шара жоспарланған. Тек Абай ауданының өзінде ғана мерейтойды ұйымдастыру аясында іргелі жобалар іске асырылған. Абайдың туған жері – Сырт Қасқабұлақта Мемориалдық кешен бой көтерген. Абайдың әкесі жерленген Ақшоқы мекені абаттандырылып, Құнанбай Өскенбайұлы мұражайы салынды. Жидебайдағы "Абай - Шәкәрім" кешеніне, Абайдың музей-үйіне заманауи талаптарға сай жөндеу жұмыстары жүргізілген", деп жазды ол.
Оның айтуынша, еліміздің өзге аймақтары да Абай мерейтойына өз үлестерін қосуда. "Nur Otan" партиясы мен "Jas Otan" жастар қанаты да осы мерейтой аясында еліміздің барлық өңірінде 350-ден астам іс-шара өткізген.
