Қазақ Батыры неге қаймықты?

Кейінгі 3-4 жылда Қазақ­станның да, Өзбекстанның да бокс­шылары кәсіпқой боксқа бет бұрып жатқаны баршаға белгілі. Тіпті оңтүстіктегі көршілеріміздің 2016 жылы Рио Олимпиадасына қатысқан құрамы Олимпия ойындарынан кейін кәсіпқой бокстың отаны саналған АҚШ-қа үдере көшті. Енді бір санаулы жылдардан кейін екі елдің әуесқой бокстағы текетіресі кәсіпқой бокста да жалғасатыны анық. Соның бастамасы ретінде жуырда отандық БАҚ-та қарсыластарын кәсіби шаршы алаңда қоғадай жапырып жүрген қазақстандық боксшы Батыр Жүкембаев (18-0,14 КО) пен Өзбекстанның мақта­нышына айналған нокаутшы Шохжахон Эргашев (18-0, 16 КО) қараша айында АҚШ-та жұдырықтасатыны туралы мә­лімет пайда болды. Осы ақпаратты естіген бокс жанкүйерлері жек­пе-жек күнін та­ғат­сыздана күтіп, отандасымыздың жеңі­ске жете­тініне сенім білдірген болатын.

Алайда арада бірнеше күн өткенде Жүкембаевтың бұл жек­пе-жектен бас тартқаны, оны промоутері де, бапкері де екі жақтап өзбекстандық бокс­шы­мен жек­пе-жек өткізуге көн­діре алмағаны туралы ақпарат көңі­лімізді күпті етіп қойды. Осыдан кейін жанкүйерлердің де пікірі екіге бөлінді. Бірі Батырдың өзбек боксшысынан жүрексінгенін алға тартса, екіншілері отандасымызды ақтап әлек. Осы әңгіменің ізі суымай жатып Жүкембаевтың бапкері қазақстандық vesti.kz интернет басылымына кең көлемде сұхбат берді.

Беларусь жаттықтырушысы Андрей Ивичуктің пікірінше, Батыр бұл жекпе-жектен бас тарт­паған. Тек Ресейден АҚШ-қа (Жү­кембаев бүгінде Ресейде жат­тығуда – ред) виза бермей жатқаны үшін жекпе-жек уақытын кейінге шегеруін сұрағанын айтады. «Бізге Эргашевпен жекпе-жек өткізуге ұсыныс келген кезде қатты қуан­дық. Себебі бұл Батырға рейтингте көтерілуге және чемпиондық атаққа жақындауға жақсы мүмкіндік береді. Бірақ бізде визаға қатысты мәселе туындап қалды. Мен елшіліктегі дос­тарыма қоңырау шалып көмек сұрасам да, олар қазір Ресейден Аме­риканың ешбір қаласына виза бермей жатқанын айтты. Бізге жекпе-жекті 19 қарашада АҚШ-та өткізу ұсынылды. Эргашев оңай қарсылас емес, сондықтан бұл жекпе-жек жақсы дайындықты қажет етеді», дейді ол.

Батыр Жүкембаевты жаттық­тырғанға дейін Шохжахон Эрга­шевпен бірге жұмыс істеген Ан­дрей Ивичук егер виза беріліп, жекпе-жекті өз уақытында өткіз­генде бұл айқаста Жүкембаев сөз­сіз жеңіске жететін еді дейді.

«Батырдың Шохжахонды жеңетініне 100 пайыз сенімдімін. Батыр – жан-жақты, айлакер және ақылды боксшы. Ол өте тәртіпті, бәрін мұқият тыңдайды және ұрыс жоспарын жақсы орындайды. Мен бұл жекпе-жектің жақын арада болғанын қалаймын. Өйткені мен Эргашевпен қалай жұдырықтасу керек екенін және оны жеңу үшін қандай жоспар құру керек екенін де жақсы білемін».

Десе де кәсіпқой бокстағы бірінші қазақ-өзбек текетіресінің осылайша бас­­талмай жатып ерте аяқталғаны өте өкінішті. Сон­да да бұл жекпе-жек алдағы уақытта ұйымдастырылады деп үмітте­нейік. Бірақ айқастан бі­­­­рінші болып қазақ­стандық бокс­­­­­шының түрлі себеп айтып, жұ­дырықтасудан бас тартқанын кім қалай десе де ақтап алуға кел­мейді. Әзірше бұл жекпе-жек туралы Батырдың бапкері ғана пікір білдірді. Ал екі боксшы да үнсіз.

28 жастағы Шохжахон Эрга­шев бүгін­ге дейін кәсіпқой бокс­та 18 жекпе-жек өткізіп, бар­лығында жеңіске жеткен. Тіпті 16 қарсыласын мерзімінен бұрын ұрып жыққан. Қазіргі таңда Эрга­шев әлемдік рейтингте 21-орында тұр. Ал Жүкем­баев 29-орынға жай­ғасқан.