Алматы қаласындағы Қазақ ұлттық аграрлық университетінде Қазақстан Республикасы Ауыл шаруашылығы министрі Асылжан Мамытбековтің ашық лекциясы өтті.
Алматы қаласындағы Қазақ ұлттық аграрлық университетінде Қазақстан Республикасы Ауыл шаруашылығы министрі Асылжан Мамытбековтің ашық лекциясы өтті.
Он-лайн режімінде өткен бұл лекцияға С.Сейфуллин атындағы аграрлық университет пен Семей қаласындағы мемлекеттік университеттің оқытушылары мен студенттері қатысты.
«Агробизнес-2020» және «Дипломмен – ауылға!» деп аталатын шағын бейнебаянды тамашалағаннан соң, министр университет шәкірттері дайындаған ауылшаруашылық жобаларының көрмесімен танысты.
Министр өз лекциясында қазіргі таңда еліміз азық-түлікке деген өз қажеттілігін 80 пайызға қамтамасыз ететіндігін айта келіп, орташа есеппен алғанда жылына 15,5 миллион тонна астық өндіріліп, оның 6 миллион тоннасы экспортқа шығарылып отырылғанын мәлімдеді. Бүгінде Қазақстан әлемдік астық экспорттаушы елдердің алдыңғы ондығына кіреді.
Ауыл шаруашылығы өнімдері экспортының көлемі былтырғы жылғы есеп бойынша, 3 миллиард АҚШ долларынан асып, 2012 жылы шаруашылық және фермерлік қожалықтардағы мал басының саны 20,1 пайызға өскен. Сондай-ақ, «Сыбаға» бағдарламасын қолға алудың арқасында аграрлық құрылымдардағы ірі қара малдың санындағы аналық малдың үлесі 37,2 пайыздан 43,9 пайызға жеткен.
Ел аумағында ауыл шаруашылығына салынған инвестицияның өсімі экономиканың басқа салаларымен салыстырғанда ең жоғары көрсеткішке ие екендігін алға тартқан министр әлі де болса бұл саланың кенжелеп тұрғанын баса айтты. Осыдан кейін ол студенттердің қойған сауалдарына жауап берді.
Қанат ЕСКЕНДІР,
«Егемен Қазақстан».
АЛМАТЫ.
