Кәсіпкерліктің, мемлекеттік-жекеменшік серіктестік жобаларының қатаң сынға ұшырауының бір ұшығы мемлекеттік қызметтегі жаңаша басқарушылық талаптарды жете меңгеруден, терең ойластырудан, табандылықпен шешуден гөрі, бюрократтық-алпауыттық қылықтарға әлі де бой алдыруда.
Кәсіпкерліктің, мемлекеттік-жекеменшік серіктестік жобаларының қатаң сынға ұшырауының бір ұшығы мемлекеттік қызметтегі жаңаша басқарушылық талаптарды жете меңгеруден, терең ойластырудан, табандылықпен шешуден гөрі, бюрократтық-алпауыттық қылықтарға әлі де бой алдыруда.
Елбасы Нұрсұлтан Назарбаев өз сөздерінде шағын және орта бизнесті дамытуға үнемі басымдық беріп, жан-жақты қолдау көрсетіп келеді. Сол себепті осы салаға тікелей қатысты шетін мәселелерге Үкіметтің кеңейтілген отырысында назар аударылуы тектен тек емес. Онда сөйлеген сөзінде Президент кәсіпкерлікті қолдау тақырыбына арнайы тоқталып, оны өрістетуде «Бизнестің жол картасы-2020» бағдарламасы тиімді тетікке айналғанымен, әлі де қадау-қадау проблемалардың кезігіп отырғанын жасырмады. Оның ішінде мемлекеттік-жекеменшік серіктестік жайына бөле-жара тоқталды. Өміршең тәсілді тиімді пайдалана алмай отырған өңірлер арасында Солтүстік Қазақстан облысы да аталып, 2008 жылдан бері сараптамаға бірде-бір концессиялық ұсыныстың жасалмағаны, даму институттарының осы бағыттағы жобаларға белсене қатыспайтыны қатты сынға алынды.
Иә, қарап отырсақ, бизнесті үйлесімді өркендету қарқынды қадамдар мен маңызды ынталандыру шараларынан кенде емес. Алайда, осындай қолайлы мүмкіндіктер бола тұра, шағын және орта бизнесті экономикалық, әлеуметтік жаңғырту үдерісіне тарту үлесі неге жеткіліксіз деген сауал төңірегінде әңгімелейтін болсақ, бірінші кезекте аса маңызды стратегиялық міндеттерді шешуде жергілікті басқару буынындағы түрлі оралымсыздықтар атойлап қоя береді. Біздің бұлай ой түюімізге аймақ басшысы Самат Ескендіровтің төрағалығымен жуырда өткен әкімдік отырысында өзекті мәселелердің талқылануы тамызық болды.
Елбасы тапсырмаларын орындауды басты арқау еткен алқалы жиында халыққа мемлекеттік қызмет көрсету сапасының төмендігі, билік тұтқасындағы лауазымды тұлғалардың тиісті бағдарламаларды жүзеге асырудағы кәсіби оралымсыздығы, жобаларды біліктілікпен жүзеге асырудың орнына бюрократтық пен сөзбұйдалыққа, түрлі заңсыздықтарға салынып, кәсіпкерлерді ығыр ететін жайттар көлденең тартылды. Әсіресе, ауылдық аумақтарды дамыту бағдарламаларын орындау қанағаттандырмайтыны баса айтылды. Оның ақыры экономика және бюджеттік жоспарлау басқармасы басшысының міндетін атқарушы шенеуніктің қызметінен босатылуына әкелді.
Демек, Н.Назарбаев шағын және орта бизнес өңірлік құрылымдарда жаппай дамытудың шешуші маңызға ие болғанын бірнеше мәрте еске салғанымен, жергілікті лауазым иелері кәсіпкерлік пен мемлекет арасында өзара тиімді байланысты орнықтырумен жеткіліксіз айналысып келген деген қорытынды жасауға болады. Бұл – бір. Екіншіден, өзге сала жетекшілеріне тағылым боларлық облыстық жиында шағын және орта бизнес кәсіпорындарының екінші деңгейдегі банктерден несие алу көрсеткішінің азайғаны, оның бір ұшығы ауылдағы кәсіпкерлерді қаржыландыру құлықсыздығында жатқаны айтылды. Мұның мемлекеттік-жекеменшік серіктестікке де тікелей қатысы бар. Тұтастай алғанда, өткен жылға қарағанда, несие беру мөлшері 18 пайызға өскенімен, кәсіпкерлік субъектілерін қаржыландыру 28 пайызға төмендеген. Осыдан-ақ отандық бизнестің, оның ішінде мемлекеттік және жекеменшік екітараптық қарым-қатынастардың жаңа серпініне ие болмай отырғанын көрсетсе керек. Өкініштісі сол, банктердің, ең алдымен, өзіне ғана пайдалы жағына ұмтылатыны, сұранысты желеу етіп, пайыздық өсім көлемін қолдан өсіретіні жасырын емес. Көбіне жеке бизнесті дамыту, қорғау тетіктері кейінге ысырылып жатады. Демек, банктердің ұлттық экономиканың тұрақты өсімі мақсатындағы ортақ жауапкершілігін қатаңдататын мезгіл жетті деген сөз.
Біздің ойымызға Қазақстан рыногында 20 жылға жуық жұмыс істеп келе жатқан «Жылдам тұрғызылатын материалдар зауыты» ЖШС-нің директоры Арыстанбек Бекқожиновтің жергілікті шенеуніктер мен банктерге деген қара қазандай өкпесі оралды. Оның айтуынша, жылына 3,5-4 мың тонна металл құрылғыларын жасап шығарып, 1 миллиард теңгенің өнімін игеретін кәсіпорын тұрақты мемлекеттік тапсырыс пен құрылыс жүргізу тендерлеріне ие бола алмай келеді. Әлеуеті жоғары, мүмкіндігі мол зауыт конкурстарға қанша қатысса да, қосалқы мердігерліктен аса алмай қалады. Өндіріс көлемін ұлғайтуға деген ұмтылысы мен мемлекеттік-жекеменшік серіктестікке қосылу, жеке тапсырыс арқылы жұмыс атқару талабы еш негізсіз қолдау таппай, шетқақпай қалып келеді. Өздерінен әлдеқайда әлсіз өндіріс орындарының жолдарын кесіп кететініне күйінеді. «Банктен қаражат алып, инвесторлық бағдарламаны өрістету жөніндегі ұсынысымыз да аяқсыз қалды. Алпауыт-монополистер бизнес-ахуалды жақсартып, отандық кәсіпкерліктің бәсекеге қабілеттігін қайраудың орнына, шырмауықша шырматылған тірлігі әбден діңкелетті. Жылу, жарық жүйелері кәсіпорындары мен түрлі ведомстволар басқарып отырған лауазым иелері тарапынан да осындай кедергілер жиі кездеседі. Оларды да алпауыттар тізіміне енгізіп қою артықтық етпейді», деген еді Арыстанбек Имантайұлы күйінішін жасыра алмай.
Бүгінде облыста 14 балабақша мемлекеттік-жекеменшік серіктестік бойынша жұмыс істеп, 1218 бүлдіршінді қамтыса, 9 меморандум негізінде қолға алынған жобаның 4-уі ғана қаржыландырылған. Тек әкімдіктің отырысында «Балапан» бағдарламасының атқарылу барысы қаралып, жергілікті бизнес әлеуетін тиімді пайдалану талаптарынан кейін сең қозғалған сықылды. Қазір балаларды мектепке дейінгі мекемемен қамту 3 пен 6 жас аралығы бойынша 88,6 пайызды құрайды. Геннадий Зенченко, Еркебұлан Мәмбетов, Анатолий Рафальский жетекшілік ететін агроқұрылымдар иесіз қалған ғимараттарды балабақшаларға айналдырып, коммуналдық меншікке өткізген. Облыс орталығында бұрынғы үш балабақша қайтарылып, жекеменшік иелерін тарту көзделген. Десек те, мемлекеттік-жекеменшік серіктестік шеңберінде 1 мың орындық 8 мектепке дейінгі білім беру мекемесін ашу жоспарының үлкен қиындықтарға кезігіп отырған жайы бар. Басты кедергі – қаражат тапшылығы. Жеке кәсіпкер Балдырған Ілиясов «Бизнестің жол картасы-2020» бағдарламасы аясында «Баларман» жекеменшік балабақшасын ұйымдастыру үшін банк есігін әбден тоздырған. Ал басқа кәсіпкерлер қолжетімділік болмағаннан кейін бизнес-жоспарларын қайтарып алуға мәжбүр болған.
Үшіншіден, Елбасының сынынан кейін арада бір айға жуық уақыт өтсе де, өңірде әлі күнге дейін мемлекеттік-жекеменшік серіктестікке қатысты ортақ жоспар-тұжырымның жасалмағанына қарап, тиісті басқармалар нақты проблемаларға жақындай түсудің орнына жұмыстың кабинеттік стилінен әлі арылмаған екен-ау деген тоқтамға келесің. Әупірімдеп жүріп, экономика және бюджеттік жоспарлау басқармасы инвестициялық саясат және инфрақұрылым бөлімінің басшысы Татьяна Долгихтан мемлекеттік-жекеменшік серіктестікті дамыту жөніндегі іс-шаралар бойынша бір ғана факт таптық. Ол Петропавл қаласында бір ауысымда 500 науқасты қабылдауға арналған кешенді емхананың құрылысы болды. Жалпы құны 2 миллиард теңге тұратын денсаулық сақтау нысаны жалпы тізбеге енгізіліп, ұсыныс Экономика және бюджетті жоспарлау министрлігінен қолдау тауыпты. Бірлескен жобаның одан арғы тағдыры белгісіз. Кәсіпкерлік және туризм басқармасының басшылығы мәселеге тікелей қатысы жоқтығын айтумен шектелді.
Сонда дейміз-ау, мемлекеттік-жекеменшік серіктестік жобаларын ұсыну, сараптамадан өткізу, инвесторлар табу мәселелерінің басқармалардағы лауазымды тұлғаларға еш қатысы болмағаны ма?
Өмір ЕСҚАЛИ,
«Егемен Қазақстан».
Солтүстік Қазақстан облысы.
__________________________
Коллажды жасаған Амангелді ҚИЯС.