Көңіл баураған көркемдік

Өнер • 06 Қазан, 2020

Көңіл баураған көркемдік

44 рет көрсетілді

Алматыдағы Мемлекеттік орталық музейде «Акварельді фреш» деп аталатын айрықша көрме ашылды. Өнер ұжымы мен Қазақстан суретшілер одағы бірлесе ұйымдастырған бірегей жоба қазан айының ортасына дейін жалғасады.

Арман ОКТЯБРЬ

Акварель әлемін жай ғана шым-шытырық шимайлар десеңіз, қателесесіз. Кәсіби суретшілердің танымына салсақ, бұл – кескіндемедегі ең күрделі әдістердің бірі. Минималды құралдар мен максималды мәнерлікті жымдастыра отырып, әлемді барлық түстерде нәзік түрде көрсете алатын да осы бір жанр. Жеңіл әрі қозғалмалы кескіндеме саналса да, ерекше шеберлік пен шыдамдылықты қажет ететіні тағы бар.

Қазақ даласының сұлулығы, көз тұндырар тұмса табиғат суретшілер кенебіндегі басты тақырыпқа айналған. Ең бастысы, шығармашылықтары мен темпераменттері әртүрлі шеберлердің күрделі әрі көпқырлы техникада орындаған шығармалары әр дарынның өзіне ғана тән мәнерін әйгілеп тұрғандай. Көрерменді осынау сиқырлы өнердің тереңіне бойлатуды мұрат тұтқан өнер жәрмеңкесіне қазақстандық үздік акварель шеберлерінің жүздеген картинасы қойылыпты. Көрме қабырғасынан Елена Иоктон, Абай Чунчалинов, Анна Петракова, Лидия Дроздова, Светлана Кравченко, Оксана Шольц, Елена Попова, Олена Коломыцева, Наталья Дубовая, Перизат Есназарова, Дина Гаитова, Максим Ведерников, Игорь Баграмов, Руслан Абрафиков, Ольга Салькова, Рашид Кулбатыров, Қанағат Кодеков, Камила Лаптева-Тулешова, Дәурен Қастеев, Рауан Сүлейменов, Мұхтар Сыздықов, Мақсат Қантарбаев, Майса Ықыласова, Төлеуғазы Байғалиев, Оразалы Жәнібек, Марлан Нысанбаев сынды талантты суретшілердің бірегей қолтаңбасын тамашалауға болады.

Әсіресе пейзаж, портрет, натюрморт, сюжеттік және дерексіз композициялар көрменің тақырыптық мазмұнын аша түскен. Архитектуралық сюжеттер, этникалық мотивтер және қарапайым адам өмірі – акварель суретшілерінің табиғатқа деген сүйіспеншілігін шынайы көрсетеді.

– Акварель техникасы суретшілер мен осы өнерді бағалаушылар үшін қай кезде де ең тартымды тетік болып қала береді. Бұл туындылар қағазға жазыла салған жай кескіндер емес. Әр шығарма тапқырлық пен батылдықтың, асқақ сезімнің жемісі. Аталған көрмеге Қазақстанның түрлі қалаларынан, Отанымыздың түкпір-түкпірінен нағыз шебер суретшілердің картиналары қойыла отырып, акварель өнері туындыларының кең палитрасы түзілді деп айта аламыз. Әр шығармада жоғары сапа белгісі бар, ал күрделі стиль әр суретшіні акварельдің бейнелеу өнерінде бөлек орынға қояды, – дейді Мемлекеттік Орталық музейінің қызметкері Сұлушаш Ағелеуова.

Алуан түсті бояулар балалар үшін көркемдік талғам қалыптастырып, әсемдікті сезінуге, шығармашылық қабілетін дамытуға баулиды. Сондай-ақ мұндай туындыларды тамашалау арқылы кішкентай көрермендер іскерлік дағдыларын ашудың баспалдағынан өтеді, дейді өнертанушы мамандар.