Зерттеу әдістемесінде мемлекеттік басқару сапасының негізгі көрсеткіштерін кешенді түрде айқындайтын 6 негізгі индикатор қолданылады. Жаңартылған есепте Қазақстан 5 көрсеткіш бойынша оң нәтиже байқатқан. Атап айтқанда, үкімет жұмысының тиімділігі, реттеушілік климат сапасы, саяси тұрақтылық, заңның үстемдігі, сондай-ақ жемқорлықпен күресте жақсы көрсеткіш тіркелген. Дүниежүзілік банк үкіметтің билік институттарын күшейту, олардың тиімділігін, ашықтығын және болжамдылығын арттыру бағытындағы жүйелі жұмысын жоғары бағалады.
Зерттеуге сәйкес, Үкімет жұмысының тиімділігі мемлекеттік аппарат жұмысының сапасы мен саяси-экономикалық бағыттағы тұрақтылық, сондай-ақ халықтың негізгі мемлекеттік қызметтерді (көлік, инфрақұрылым) тұтыну деңгейін арттыру есебінен жақсарса керек.
Реттеушілік климатқа тоқталсақ, еліміз бірнеше жылдан бері қалған өлшемдермен салыстырғанда, ең үздік нәтижені көрсетіп келеді. Былтыр Қазақстан шетелдік инвесторлар үшін бизнес жүргізудегі тәуекелдерді төмендету бағытында тиімді жұмыс жүргізу арқылы өз орнын көтерді.
Дүниежүзілік банк есебінде биліктің сабақтастықты қамтамасыз етуде, сондай-ақ ішкі және сыртқы жанжалдарды болдырмау есебінен еліміздегі саяси тұрақтылық көрсеткіштерінің жақсарғаны туралы айтылған.
Заң үстемдігіне келсек, дауларды баламалы реттеу жүйесін дамыту, құқықтық тәртіпті қамтамасыз ету, сол секілді азаматтық және қылмыстық заңнамаларды жақсарту есебінен ілгерілеу байқалды.
Сыбайлас жемқорлыққа қарсы күрес бойынша халықтың парақорлықты қабылдау субиндикаторларының жақсаруы негізінде және бизнес жүргізуде жемқорлық тәуекелдерінің төмендеуі есебінен артты.
WGI есебін озық халықаралық қаржы ұйымдары, даму институттары және рейтинг агенттіктері ұлттық экономикалардың болжамдары мен несиелік бағалауларын қалыптастыру үшін кеңінен қолданады.
Зерттеу нәтижелері бойынша Fitch рейтинг агенттігі де ұлттық экономиканың кредиттік бағасын «BBB» деңгейінде нығайта отырып, Үкімет жұмысының оң динамикасын атап өтті. Биыл тамызда пандемиядан туындаған әлемдік экономикалардың кредиттік бағалауларын қайта қарастыру арқылы Fitch Қазақстан экономикасының «BBB» деңгейіндегі пандемияға дейінгі бағалауын растады. Демек болжам тұрақтылықты көрсеткен.
