Бұған дейін бірнеше әлеуметтік жобаларды дүниеге әкелген павлодарлық өнертапқыш Әл-Фараби Ұзақ жұмыс істеу тәртібі ZOOM-ға ұқсас МееТоU платформасын іске қосты. IT-маманның айтуынша, бұл жүйенің америкалық платформадан артықшылығы көп. Егер ZOOM-ның тегін жүйесінде адам саны 100-бен, ал уақыт ұзақтығы 40 минутпен шектелген болса, отандық платформада мұндай шектеулер жоқ. Мұнда бағдарламаны жүктеп, кей адамдарға әрі қарай нені басу керек, оны қалай жүктеу керек деген сынды мәселелер болмайды, өйткені МееТоU платформасын компьютерге немесе смартфонға жүктеу қажет емес. Қолданушы арнайы сілтеме арқылы бейнеконференцияға автоматты түрде қосылады.
Өнертапқыштың айтуынша, аталған қосымша бір адамды екінші адаммен видео арқылы байланыстыруға мүмкіндік беретін WebRTC технологиясымен жасалған. Қосымшаның жұмыс істеу принципі кез келген адам үшін қолайлы әрі оңай. Мұнда да америкалық платформадағыдай микрофоныңыз бен камераңызды қажет уақытында өзгелерге бөгет жасамас үшін өшіре аласыз. Спикермен интерактивті байланыс орнату үшін қажет болатын функциялардың барлығы қарастырылған.
«МееТоU қосымшасын жасау кезінде ең әуелі түрлі бейнебайланыс орнатушы бағдарламаларды зерттеп шықтым, оған бір жарым айға жуық уақыт кетті. Зерттеу жұмыстарының қорытындысы нәтижесінде бір ай ішінде өзіндік артықшылықтары бар отандық платформа дүниеге келді. Қазір адамдарға бағдарламаны қолдану жеңіл болуы үшін iOS және Android-қа арналған жүйе жасалды. Енді мобильді қосымшаны App Store және Play Маркетке салуды жоспарлап отырмыз», – деді Ә.Ұзақ.
Бүгінде МееТоU қосымшасы арқылы С.Торайғыров атындағы Павлодар мемлекеттік университетінің студенттері онлайн білім алуда. Сондай-ақ платформа көмегімен университет педагогтерінің жиналысын онлайн-форматта өткізу тестіленіп жатыр. Әзірге оған бір уақытта әрқайсысында 100 адам бар 4 лек қосыла алады. Алдағы уақытта олардың санын арттыру көзделген.
It-Hub директорының міндетін атқарушы Дария Әбікенова қазір аталған сервис апробациядан өткенін және оны оқу үрдісіне енгізу үшін жұмыстар сәтті жүзеге асырылып жатқанын айтады. Әл-Фараби Ұзақ платформа тестілеу деңгейінен өткен соң, толықтырулар мен өзгерістерден кейін қосымшаны еліміздің басқа да оқу орындарына ұсынуды жоспарлап отыр.
Жас маманның бұған дейінгі ауыл шаруашылығы өнімдері тауарларын бір жүйеге байланыстырушы KazAgroTrade және түрлі тауарларды жеткізу қызметін ұсынушы GreenMart қосымшалары қолданушылардың жұмысын жеңілдетіп, уақытын үнемдеп, әлеумет арасында кең қолданысқа енген еді. Ендігі ішкі байланыс құралы ретінде жасалған дүниесі де қоғамға пайдалы болады деп сенеміз.
