КӨПШІЛІК ПІКІРІНІҢ КӨМЕГІ ДЕ КӨЛДЕЙ

Кеше Экономикалық даму және сауда министрлігінде Премьер-Министрдің бірінші орынбасары Өмірзақ Шөкеевтің төрағалығымен “Кеден одағы: мүмкіндіктері мен перспективалары” атты дөңгелек үстел отырысы болып өтті. Оған Кеден одағы комиссиясының жауапты хатшысы С.Глазьев, Экономикалық даму және сауда министрі Жанар Айтжанова, Қаржы министрі Болат Жәмішев, Ауыл шаруашылығы вице-министрі Арман Евниев, Парламент Мәжілісінің депутаты К.Сағадиев, сол сияқты Р.Алшанов, М.Махмұтова, К.Берентаев, С.Байзақов сынды ғалымдар қатысып, өз пікірлерін ортаға салды. Басқосуда бірінші вице-премьер Өмірзақ Шөкеев Кеден одағы ая­сын­дағы әрбір келісім бойынша жұмыс тобын құруды ұсынды. “Жұ­мыс то­бы­ның құрамына мемлекеттік орган­дардың өкілдерінен бөлек, депутат­тар­ды және ғалымдарды қосу қажет,  бұл ретте Кеден одағы аясын­дағы әр­бір келісім бойынша қатысушы бар­лық елдер қандай да бір ымыраға ке­лу­лері тиіс”, деп атап өтті Өмірзақ Ес­тайұлы. Сондай-ақ темір жол та­риф­теріндегі кейбір аса маңызды мә­се­лелерді де назардан тыс қалдырмау керектігін тілге тиек ете келе “Бұлар іргелі мәселелер, сон­дықтан да әрбір келісім бойынша жұмыс тобын құрып, оның құрамы­на депутаттар мен ға­лым­дарды кір­гізіп, талқылау қажет. Біз тал­қылауға мүдделіміз. Бұл сонша­лық­ты күрделі әрі терең іс болғандықтан, бір жерлерде келеңсіздік жіберіп алу ықтималдығы жоғары”, деді өз сөзінде бірінші вице-премьер. Ө.Шөкеев осындай бас­қо­су­лар­дың алда тағы да өтетіндігін хабарлады. “Дөңгелек үстел” басындағы әңгіме жөнінде таяу күндері толығырақ сөз ететін боламыз. Әбдірахман ҚЫДЫРБЕК.