Мүгедектігі бар тұлғалар күніне арналған шаралар

Бұл үшін Еңбек және халықты әлеуметтік қорғау министрлігі арнайы іс-шаралар жоспарын әзірледі. Вице-министр Ерлан Әукеновтің айтуынша, бұл мерекелік және салтанатты іс-шараларды, қайырымдылық қолұшын созуды және басқа да акция­­­ларды қамтиды.

Барлық іс-шаралар міндетті түр­де әлеуметтік арақашықтықты және карантиндік қауіпсіздік шара­ла­рын сақтай отырып өткізіледі. Мысалы, медициналық-әлеуметтік мекемелерде және дәрігерлік амбулаторияларда мүгедектігі бар тұлғаларға онлайн режімде «Ашық есік күндері» өтуде. Қажет болса, денсаулықты тексеру үйде қолға алынады. Сондай-ақ жергілікті атқарушы органдар мүмкіндігі шектеулі жандар тұра­тын отбасылардың тұрмыстық жағ­дайына зер салып, оларға әлеу­мет­тік мәселелерді шешуде қажетті көмек көрсетіледі. Сонымен қатар қайы­рымдылық акциялары аясында мүгедектігі бар ауыр науқас азамат­тар­ға бару жоспарланған, оларға азық-түлік себеттері беріледі. Бұдан тыс, мүгедектігі бар адамдарға күтім жа­сайтын отбасыларға қайырым­ды­лық көмек көрсетіледі.

Вице-министр мүгедектердің өмір сүру сапасын жақсарту жөніндегі жұмыс Қазақстан Республикасында 2025 жылға дейін мүгедектердің құқығын қамтамасыз ету және өмір сүру сапасын жақсарту жөніндегі ұлттық жоспар шеңберінде кешенді түрде жүргізіліп жатқанын атап өтті. Мәселен, мүгедектігі бар жандардың өмір сүру сапасын жақсарту мақ­са­тында қолданыстағы заңнамаға түзетулер әзірленді (24 заңнамалық акті мен 3 Кодекске).

Осы санаттағы азаматтарды бел­сен­ді жұмысқа тарту мәселелеріне ерекше назар аударылады. Қазіргі уақытта мүгедектігі бар тұлғаларды одан әрі жұмысқа орналастыру үшін сұранысқа ие мамандықтар бо­йынша оқыту жүргізілуде. Мәселен, ерекше қажеттіліктері бар 120 адам IT мамандықтары бойынша білім алуда. Бизнесте жүрген немесе стартап-жобаларға ие мүгедектігі бар адамдарға акселерация, ауқымды кеңей­ту, бизнес-тәлімгерлік, оқыту, жаңа нарықтарға шығуға көмектесу мақсатында жәрдем жасалады.

Сонымен бірге, ағымдағы жылдың қараша айында мүгедектігі бар адам­дарға арналған Мамандықтар атласын әзірлеу аяқталады. Бұл жұмыс берушілерге, жұмыспен қамту орта­лықтарына және жеке HR-агент­тіктерге, шектеу түріне байланыс­ты қолайлы бос жұмыс орындарын іріктеуге, Электронды еңбек биржасы арқылы бос жұмыс орындарын таңдауды автоматтандыруға мүмкіндік береді.