Астанада British Council және Қазақстандағы «Шелл» компаниясының ұйымдастыруымен «Филармония» оркестрінің концерті өтті.
Астанада British Council және Қазақстандағы «Шелл» компаниясының ұйымдастыруымен «Филармония» оркестрінің концерті өтті.
Бұл кеш Қазақстан мен Ұлыбритания арасындағы мәдени байланыстарды нығайту бойынша іс-шаралар топтамасындағы алғашқы шаралардың бірі болып табылады.
Концерт басында сөз алған Қазақстандағы British Council директоры Саймон Уильямс: «Біз өнер саласындағы ынтымақтастық Қазақстан мен Ұлыбритания арасындағы мәдени байланыстарды нығайтуға, сондай-ақ, Қазақстандағы мәдени саланың әлеуетін арттыруға көмектесетініне бек сенеміз», деп барлық серіктестеріне алғысын білдірді.
Аты аңызға айналған оркестр бағдарлама бойынша екі музыкалық туындыны тарту етті. Алғашқы бөлімде Игорь Стравинскийдің «Сарбаздың оқиғасы» аспаптық сюитасын орындаса, шығарманы қазақстандық актер Филип Волошин еш мүдірместен асқан шеберлікпен оқып берді. Ал, екінші бөлімде атақты британдық әнші Кэтрин Харристің қатысуымен Уильям Уолтонның «Фасад» атты шығармасы орындалды. Кеш бүкіл әлем мойындаған дирижер Робин О'Нилдің жетекшілігімен өтті.
«Филармония» оркестрі Ұлыбританияның ұлттық оркестрі болып саналады. Бұл оркестр туындыны орындау сапасымен, музыка саласындағы ең соңғы технологияларды пайдалануымен ерекшеленеді. Жаһанға есімдері әйгілі музыканттарымен, оның ішінде оркестрдің шығармашылық жетекшісі болып табылатын дирижер Эса-Пекка Салоненмен ынтымақтастық жасауының арқасында «Филармония» оркестрі Британия саз әлемінің ордасына айналып отыр. Қазақстан мен Ұлыбританияның өнер саңлақтары қатысатын мәдени шаралар келесі жылы да жалғасын табатын болады.
Нұрзада КҮМІСБЕК,
Еуразия ұлттық университетінің студенті.
