Жиында өңірдегі экологиялық мәселелерді шешу бойынша дайындалып жатқан Жол картасының жобасы таныстырылды. Министрдің айтуынша, қазір Қостанай облысында экология бойынша бірқатар проблема бар. Жол картасы соның бәрін қамтуы тиіс.
«Мұндай проблемалардың қатарына Қостанайда биологиялық тазарту стансаларының жоқтығын, өңірдегі қалаларда канализациялық тазарту ғимараттарының тиімсіз жұмысын, елді мекендердегі қатты тұрмыстық қалдықтарды орналастыру мәселесін жатқызуға болады. Осы және өзге де мәселелер бойынша кешенді шаралар қабылдау керек. Бұл бағытта әкімдіктің атқаратын жұмысы маңызды. Жол картасына нақты шаралар енгізілді, енді соны жүзеге асыру қажет», деді М.Мырзағалиев.
Айта кетелік, аталған өңір бойынша дайындалған Жол картасы көгалдандыру, жер ресурстары, су ресурстары, қалдықтарды басқару, атмосфералық ауаға шығарылатын қалдықтарды азайту секілді 7 бөлімнен тұрады. Кездесуге қатысқан қоғамдық ұйымдар мен өңірдегі ірі өндіріс орындарының өкілдері енді Жол картасы жобасымен толық танысып, екі апта ішінде өз ұсыныстары мен ескертулерін беруі тиіс.
«Біздің мақсатымыз бен міндетіміз ортақ екенін түсіну керек. Кері байланыс қажет. Тек сонда ғана аталған құжат арқылы өзекті экологиялық проблемаларды шеше аламыз», деп атап өтті министр.
Экологиялық ахуалды жақсартуға бағытталған Жол карталарын министрлік басқа өңірлер халқымен де талқылауды жалғастырады.
