«Ақпараттық-есептеу орталығы» АҚ баспасөз қызметінің мәліметінше, сақтандыру екі өніммен ұсынылған. Біріншісі, сақтандыру шаруашылық аумағында жүргізілсе, екінші сақтандыру кеңейтілген, яғни шаруашылықтан 5 шақырым радиусты құрайтын көлемде жүргізіледі. Асыл тұқымды және қарапайым сиырларды сақтандыру мүмкіндігі бар. Ең төменгі саны 30 ірі қара болуы шарт.
Түсінікті болу үшін екі мысалды қарастырайық. Мысалы, фермерде 30 бас асыл тұқымды, жеткілікті ірі қара бар, бір бастың орташа құнын фермер 500 мың теңгеге бағалайды делік. 30 бас – сақтандыруға жататын минималды табын. Осындай мал санына тариф ең жоғары – 2,31%. Бұл мысалда сақтандыру сомасы 15 млн теңгені (30х500 000) құрайды. Төлем үшін сыйлықақы – 346 500 теңге.
Осы жерде арнайы түсіндірме қажет. Сақтандыру кезінде Ауыл шаруашылығын қаржылай қолдау қоры арқылы төленетін 50%-дық мемлекеттік субсидия бар. Іс жүзінде, сақтандыру шартын жасағанда, мал өсірушіге бұл соманың тек жартысын, яғни 173 250 теңгені төлеуі қажет. Осылайша егер бүкіл табын тасқын суға батып кетсе немесе зиянкестер басып алса, сақтандыру төлемі 14 млн 500 мың теңгені құрайды. Қалған бөлігі (500 мың теңге) – кез келген жағдайда сақтандыру компаниясында қалатын сөзсіз аударылым.
Егер бүкіл табын емес, тек 5 бас қана зардап шексе, бұл үшін төлем 2 млн теңгені құрайды (4 бас үшін). Қарапайым тілмен айтқанда, бір сиыр әрқашан сақтандыру компаниясының пайдасына шығады.
Нәтижесінде, жылына бір бас үшін 5 775 теңге (173 250 / 30 бас) төлеген фермер болашақта өзін көптеген қиыншылықтардан құтқара алады.
Ең төменгі тариф көрсеткіші – 1,54%, бұл тек 100 және одан көп бас малды сақтандырудан басталады. Түсінікті болу үшін тағы да мысал келтірелік. Сақтандыру шарты бойынша бар-жоғы 385 мың теңгені төлей отырып (дәл сол мөлшерде мемлекеттен субсидия алынады), сіз қандай да бір себеппен мал өлімінің салдарынан қорғана аласыз. Сонымен бірге 1 басты сақтандыру құны небәрі 3 850 теңгені құрайды. Асыл тұқымды сиырлардың нақты құнын ескеретін болсақ, бұл онша көп емес.
– Атап өту керек, тараптар қол қойған сақтандыру шарты, қол қойылғаннан кейін бір айдан кейін ғана «жұмыс істей» бастайды. Бұл жалған схемалардың алдын алу үшін жасалады. Жалпы алғанда, механизмнің өзі өте қарапайым және ыңғайлы. Өйткені келісім жасаудың барлық процесі онлайн режімде, Qoldau сайтында өтеді. Фермер, бүгінде қызмет көрсететін 5 сақтандыру компанияларының ішінен таңдау жасай алады. Біздің компания сақтандырумен айналыспайды, біз ақпараттық қызметті ұсынамыз. Сақтандыру компанияларының тізімі бойынша фермер өзі сенімді компанияға тәуелсіз таңдау жасайды. Малды сақтандыру фермерлердің несие алуы үшін өте маңызды. Өйткені банктер мен қаржы ұйымдары сақтандырылған малды кепілдікке алады. Бұл – үлкен жетістік. Фермерлер мұндай механизмді көптен күтті, – деп түсіндіреді «AGROINSURANCE» компаниясының маманы Машур Зарлық.
Сақтандыру жағдайы туындаған жағдайда фермер төлемдерге онлайн режімінде, сондай-ақ «AGROINSURANCE» қызметін пайдалана отырып, Qoldau порталы арқылы жүгіне алады. Сақтандыру компаниясы келісімшартқа сәйкес деректерді тексеру үшін шаруа қожалығына баруға құқылы.
