Әрине, сауда орталығының ашылуы Баянауылдың тау баурайындағы ауыл тұрғындары үшін де тиімді. Олар базарлық алуға енді әсем ғимаратқа келеді. Жарқыраған орталықты аралап өрушілер қатары да көбейеді. Сауда орталығы ашылған күні ең бірінші аудан әкімі Қанат Кәрімов сауда жасады. Аудан орталығындағы сәнді дүкенге келушілер онда қаладағыдай қызмет көрсетілетініне қуанып жүр.
– Біздің сауда орталығында азық-түлік өнімдері, көкөніс, тұрмыстық заттар және басқа да барлық бұйымдар саудаланады. Дәріхана да орналасқан. Сауда орталығы 14 сағат жұмыс істейді. Аудан орталығында жаңадан 15 жұмыс орны ашылды. Зейнеткерлерге, мүмкіндігі шектеулі жандарға 15 пайыздық жеңілдік қарастырылған, – дейді сауда үйінің директоры Бауыржан Сапаров.
INMART супермаркеті аудан орталығына кіреберістегі жол бойында орналасқан. Баянауылдың табиғаты ғажайып курорттық аймақ екенін ескерсек, жарқыраған супермаркет қысы-жазы келетін туристерге де тиімді. Аудандық кәсіпкерлік және сауда бөлімінің мәліметінше, аудан орталығында алғашқы супермаркеттің құрылысын жүргізіп, әсем сауда орнын халыққа пайдалануға берген ағайынды кәсіпкерлер Сағадат және Қайрат Тұрсынбаевтар. Қазір аудан бойынша 1 358 шағын бизнес нысаны болса, 240 шағын дүкен жұмыс істеп тұр. Азық-түлік тауарларын сатуға арналған 164 дүкен бар.
Павлодар облысы,
Баянауыл ауданы
