Конференцияға қатысушылар Зарқын Тайшыбайдың Солтүстікте журналистика мектебінің негізін қалап қана қоймай, ғылыми ізденістермен айналысқанын да атап өтті. Осы уақыт аралығында ол 10 монография, 12 оқулық, 250-ге тарта мақала жазған. "Этномәдени зерттеулер" ғылыми орталығын ашып, Абылай хан, Абай мен Мағжан өмірі мен шығармашылығына арналған құнды еңбектер жазған. Сонымен қатар ол 5-7-сынып оқушыларына арналған "Өлкетану" оқулығының авторы. Алаштану бағытында да көп еңбектеніп, олардың есімдерінің жаңғыруына еңбек сіңірген.
Зарқын Сыздықұлын мерейлі қызметімен облыс әкімі Қ.Ақсақаловтың атынан орынбасары Ғани Нығыметов, СҚУ ректорының міндетін атқарушы Нұрлан Бәйімбетов, облыстық ардагерлер кеңесінің төрағасы Ескендір Елеусізов, филология ғылымдарының докторы Бауыржан Жақып, әл-Фараби атындағы Қазақ Ұлттық университетінің деканы Сағатбек Медеубекұлы және тағы басқалары құттықтап, арқасына шапан жапты.
З. Тайшыбай қазір Қазақстанға еңбек сіңірген қайраткер, профессор. Осы конференцияда оған Қазақстан Жоғары мектептері академиясының академигі атағы берілгені жария етілді. Іс-шараны университеттің проректоры Ақмарал Ыбыраева жүргізіп отырды.
ПЕТРОПАВЛ
