Қысқы мезгілде үйді немесе ғимаратты жылыту үшін газ жағу айрықша сақтықты қажет етеді. Өйткені газ жағу кезіндегі салғырттық өрт немесе улану қаупін күшейте түседі. Жыл басынан бері өңірде улы газдан улану салдарынан екі адам жарақат алды. Табиғи газбен уланудан қаза болу себебі – газ қазандығын орнату және пайдалану кезінде өрт қауіпсіздігі ережелерін сақтамаудан туатыны белгілі.
Маңғыстау облысының барлық елді мекендері орталықтандырылған газбен қамтамасыз етілген. Сондықтан газды қолдану ережелерін үйретіп, сақтық шараларын сақтауды талап ету облыс бойынша жүргізілуі тиіс. Облыстық төтенше жағдайлар департаменті қызметкерлері өрттің алдын алу және адамдардың улы газбен уланудан қаза болуы мен жарақаттануын болдырмау мақсатында халықпен тұрақты түрде өрт қауіпсіздігі қағидаларын түсіндіру жұмыстары жүргізіледі. Бұл – жылыту маусымына дайындық кезеңінің басым бағыттарының бірі. Департамент жергілікті атқарушы органдармен бірлесіп, халықтың әлеуметтік осал топтарының 3 мыңнан астам үйін есепке алды, оның ішінде барлық үйлер аулаларды аралаумен қамтылды.
– Рейдтер нәтижесінде 648 үйде 749 өрт қауіпсіздігі талаптарын бұзу анықталды. Айта кету керек, бұған дейін бұзушылықтар анықталған үйлер ағымдағы жылдың 1 қарашасына дейін қайта тексеріліп, 398 үй қамтылды. Ал халықтың әлеуметтік осал топтарының тұрғын үйлерін қоспағанда, департамент қызметкерлері 8 мыңнан астам адамды қамти отырып, 3 мыңнан астам ауланы аралап шықты. Өрт кезінде дұрыс мінез-құлық дағдыларын дамыту мақсатында 240 оқу орнында 14 мыңнан астам оқушыны қамти отырып, 28 интерактивті және ашық сабақ өткізілді, – дейді облыстық төтенше жағдайлар департаментінің басшысы Қуанар Базарбаев.
Жұмыс аудандар мен қалаларда жалғасын табуда. Маңғыстау ауданы Төтенше жағдайлар бөлімінің №8 ӨСБ жеке құрамы «ҚазТрансГазАймақ» қызметкерлерімен бірлесе жылыту маусымының басталуына байланысты Шетпе ауылының іргесіндегі Ащыбұлақ ауылында орналасқан тұрғын үйлерге «Қазақстан-Ақтау телеарнасының» қатысуымен өрт қауіпсіздігін сақтау мақсатында түсіндіру жұмыстарын жүргізді. Профилактикалық жұмыс барысында 2 072 адамды қамтитын 441 тұрғын үйді аралап, бірқатар қателіктерді анықтады. Мысалы, 31 үйде жылыту пештері үйдің ішінде орналасқан болса, 14 үйде ауа айналатын желдеткіштің болмауы, 21 үйде жылыту пештерінің қасында жанғыш заттар қоюға жол берілгені сынды 66 бұзушылық анықталды.
Түсіндіру жұмыстары кезінде ТЖБ қызметкерлері, жылу пештерінің дұрыс орналасуы қажеттігін, балаларды жалғыз қалдырмау керектігі жөнінде, электр құрылғыларын пайдалану кезіндегі өрт қауіпсіздігі ережелерін, өңірдегі көп таралған өрттің шығу себептері және оның салдарын көрсете отырып, өрт қауіпсіздік талаптарын сақтау қаншалықты маңызды екенін түсіндірді. «Сақтықта қорлық жоқ» дегендей, қауіпсіздік шараларын алдын ала жүргізіп, сақтана білгенге не жетсін?!
Маңғыстау облысы
