«Кеншілер» командасын бұған дейін басқарған ресейлік маман Руслан Сулейманов қызметінен кеткеннен соң, оның орнын отандасы Александр Соколов басты. 1995 жылдан бастап бапкерлік қызметін атқарып келе жатқан 63 жастағы маман «Сарыарқа» жанкүйерлеріне жақсы таныс. Өйткені ресейлік бапкер 2017/2018 жылғы маусымда да Қарағанды клубын жаттықтырған.
Соколовтың бапкерлік қызметіндегі ең табысты кезеңі деп 1998/1999 жылғы хоккей маусымын айта аламыз. Сол жылы Нижнекамскінің «Нефтехимик» командасымен бірге Суперлига чемпионатының (Ресей біріншілігі) плей-офф кезеңіне дейін жеткен. Кейіннен Жоғары хоккей лигасы мен Жастар хоккей лигаларында өнер көрсететін Нижнекамскінің «Реактор», Кирово-Чепецктің «Олимпия», Лениногорскінің «Нефтяник», Пензаның «Дизеля» командаларын жаттықтырған. Ал «Сарыарқаға» келгенге дейін Самараның ЦСК ВВС клубының бас бапкері қызметін атқарды.
Айта кетейік, Жоғары хоккей лигасында бақ сынаған «Сарыарқа» клубы пандемияға байланысты ЖХЛ-дан бас тартып, Қазақстан чемпионатында өнер көрсетуге шешім қабылдады.
