Суретті түсірген Ерлан ОМАР, «EQ»
Үстіміздегі айда облыста коронавирусқа шалдыққан 63 науқас тіркелген. Эпидемиолог мамандар жаман тұмаудың бас көтеруіне тұрғындардың бұрынғысынша белсенді өмір дағдысына оралуы, санитарлық талаптарды орындамауы себеп болып отырғанын айтуда.
– Қазіргі таңда әлемнің көптеген елдерінде эпидемиялық жағдай күрделене түсуде. Еліміздің денсаулық сақтау министрлігінің мәліметтеріне сүйенсек, ТМД мемлекеттерінің жартысында коронавирусқа шалдыққан науқастар саны Қазақстанға қарағанда 11 есеге көп. Облыстағы ахуал мұқият бақылануда. Коронавирустың кең таралуының алдын алу үшін тікелей эпидошақтармен жұмыс жүргізілуде. Жаман тұмаудан облысымызда 77 адам көз жұмды. Бүгінде стационарларда және үй жағдайында 142 науқас ем қабылдап жатыр. Сегізінің жағдайы ауыр. Бірақ, өкпені жасанды желдету аппаратына қосылған науқастар жоқ. Облыс бойынша 565 инфекциялық төсектік орын әзірленді. Қазір оның 17 пайызы қолданыста, дейді облыс әкімінің орынбасары Айна Мысырәлімова.
Сыбайлас жемқорлыққа қарсы іс-қимыл агенттігі Ақмола облысы бойынша департаментінің басшысы Мұрат Төлеубаев пандемия кезеңінде дәріханаларға мониторинг жүргізу кезінде дәрі-дәрмек бағасын негізсіз қымбаттатудың 32 дерегі анықталып, 14 әкімшілік хаттама толтырылғанын айтуда. Облыстық тауарлар мен көрсетілетін қызметтің сапасы мен қауіпсіздігін бақылау департаментінің басшысы Айнагүл Мусина еліміздің солтүстік өңірлерінде эпидемиялық ахуалдың күрделене түскеніне алаңдаулы. 16 қазаннан бастап карантин шаралары күшейтілді. Бас мемлекеттік санитарлық дәрігердің қаулысына сәйкес, сауда орындарының жұмыс уақыты шектелді. Сонымен қатар демалыс күндері қоғамдық көліктер жүрмейді.
Көпсалалы облыстық ауруханасы коронавирус пандемиясы наурыз айында елімізді дендей бастаған тұстан-ақ аталған індетпен күресті бірден бастап, оның тарап кетпеуі мақсатында жұмыс істеген болатын. Облыстың мемлекеттік бас санитарлық дәрігерінің қаулысына сәйкес, тері-венерологиялық орталығы мен Көкшетау медициналық колледжі жатақханасының базасында жұқпалы-провизорлық, карантиндік стационарлар ұйымдастырылды. Наурыз-мамыр айларында мұнда 355 төсектік орын ашылып, оның 255-і карантиндік, 100-і провизорлық бөлімшелерде болды. Жұқпалы бөлімшеде індет жұқтырғандығы лабораториялық жолмен, ПТР тестімен анықталған науқастар емделсе, провизорлық орталықта індет белгілері бар адамдар болды, карантиндік бөлімшеде науқастармен қарым-қатынаста болғандар жатқызылды.
Жұқпалы-провизорлық, карантиндік стационарлар барлық санитарлық-эпидемиялық нормаларға сәйкес, қала ішінде болса да, маңайындағы ешбір мекемемен шектесіп, қосылмайды. Арнайы бөлек кіретін бекеттері, желдеткіш жүйелері бар. Бір ерекшелігі, мекеменің әр қабаты орталықтандырылған оттегімен қамту жүйесімен жабдықталған. Реанимациялық блок 11 жасанды желдету аппараттарымен жабдықталып, стационар оттегі концентраттарымен, жылжымалы рентген аппаратымен жарақтандырылған. Таяуда қуаттылығы минутына 300 литрді құрайтын оттегі концентратын сатып алуға облыстық бюджеттен қаржы бөлінді.
– Қазіргі уақытта жоғарыда аталған екі мекемені орталықтандырылған оттегімен қамту шаралары қолға алынып жатыр. Қараша айының соңына қарай тері-венерологиялық орталық пен медициналық колледж жатақханасы орталықтандырылған оттегі жүйесімен толық қамтылады. Арнайы станса құрылды. Жалпы, осы орталықтандырылған оттегі жүйесімен қамту үшін бюджеттен шамамен 100 млн теңгеге жуық қаржы қарастырылды, – дейді көпсалалы облыстық аурухананың бас дәрігері Нұрлан Жаров.
Көпсалалы облыстық ауруханада індет дендеген кезде онымен күресуге 198 қызметкер жұмылдырылды. Олардың 38-і дәрігер, 86-сы орта медициналық қызметкер, 74-і кіші медициналық персонал. Жалпы, 5 наурыз бен 15 қыркүйекке дейінгі аралықта жұқпалы-провизорлық, карантиндік стационарларда бас-аяғы 2 040 науқас емделіп шыққан. Соның ішінде
257-і жұқпалы, 934-і провизорлық, 849-ы карантиндік бөлімшелерде емделген.
Індет анықталған науқастарды және олармен қарым-қатынас жасаған адамдарды стационарларға жатқызу үшін арнайы құрал-жабдықтары мен оқшаулау кабиналары бар көліктер пайдаланылыпты. Қазіргі уақытта стационарлар дәрі-дәрмек, оттегі концентраттары, зарарсыздандыру секілді қорғаныс құралдарымен толық қамтылып, бірнеше айға жететін қор жинап алды. Пандемияның екінші толқынына дайын екендіктерін жеткізген бас дәрігер әлі де болса, дайындық жұмыстары күн сайын жүргізіліп жатқанын айтып отыр.
– Әзірге уақытша жабық тұрған бұл стационарлар қажет бола қалған кезде міндетті түрде қайта ашылып, науқастарды қабылдайтын болады. Дәрігерлер тапшылығы қашан да өзекті мәселе, оны ведомстволық басқарма шама-шарқы жеткенше шешіп жатыр. Биыл жоғары оқу орындарын тәмамдаған біршама жас мамандар қатарымызға қосылды. Осылайша маман тапшылығын азайтып жатырмыз. Көп қызметшілердің тәжірибелері қалыптасып қалды. Эпидемиямен күреске әзірміз, – дейді Нұрлан Қайырұлы.
Сақтық артық етпейді. Облыста атқарылып жатқан дайындық жұмыстары алғашқы кезеңдегі олқылықтардың орнын толтырып, қапысыз қамданудың қажеттілігінен туындаған дүние. Денсаулық сақтау саласының басшылары жауапкершілікті жете түсініп, жіті қимылдап отырғандығы көңілге медеу.
Ақмола облысы
